O bar de Pepe agora leva as tapas a casa, porque Pepe viu que no delivery e o take away está a oportunidade nestes momentos. Como podes saber se o teu restaurante favorito do barrio ten servizo a domicilio ou para levar? Pois segue lendo:
Consulta a súa web
O primeiro que tes que facer é buscar na súa web ou redes sociais se ofrece este tipo de servizos e como o fai. Algúns restaurantes traballan con apps tipo Just Eat ou Deliveroo, mentres que outros se reinventaron recollendo pedidos a través de WhatsApp, correo electrónico ou Instagram.
Búscao en Google Maps
Outra opción moi cómoda é buscar o local en Google Maps, utilizando os novos filtros “para levar” ou “a domicilio”, dependendo do que che apeteza: se recoller o teu pedido e saudar a Pepe 😉 ou que cho deixen na porta.
Mira se está nunha app de comida a domicilio
As aplicacións para o móbil de comida a domicilio tiveron máis traballo que nunca. Bota un ollo para ver se o teu restaurante da esquina está nalgunha delas:
- Just Eat: a app permíteche pedir a domicilio ou recoller comida de máis de 9.000 restaurantes en toda España. Só na Coruña, conta cuns 200 locais. Está dispoñible para móbiles Android e iOS.
- Glovo: ademais de comida, podes pedir calquera cousa; por exemplo, un viño para acompañar a cea. Tela dispoñible en Android e iOS.
- Deliveroo: lévache a comida a casa, ‘ofi’, parques, praias e ata cámpings. Descárgaa se tes un móbilAndroid ou iOS.
- Uber Eats: podes pagar a través da app e seguir o estado do teu pedido en tempo real. Dispoñible para Android e iOS.
- Yump: unha das apps máis novas deste mundo, cuxa filosofía é que saltes a cola cando vas recoller un pedido. Próbaa no teu móbil Android e iOS.
E se falamos de apps de comida, ten que soarche si ou si Too Good To Go. Xa hai unha chea de restaurantes na app (Android e iOS), que che ofrecen paquetes sorpresa coa comida que non teñan vendido a un prezo reducido. Se non a coñeces, na entrevista que lles fixemos cóntannos máis cousiñas.
É o momento de apoiar os nosos restaurantes. Úneste?