Unha das citas festeiras máis populares do verán galego está en Cedeira. Alí honran do 10 ao 17 de agosto á patroa dos mariñeiros e da localidade, á Nosa Señora do Mar, cunhas festas repletas de actividades. Aquí tes o programa das Festas de Cedeira 2024.
En Cedeira prepararon un programa de festas con actividades para todos os gustos e públicos no que figuran verbenas, concertos, fogos artificiais, teatro, circo... Tampouco faltan a tradicional procesión marítima, o Entroido de Verán ou a "Xira" en Santo Antón de Corveiro.
Programa das festas de Cedeira 2024
Dende o pregón do sábado 10 á "Xira" do sábado 17 de agosto, non queremos que perdas nada das festas cedeirenses en 2024, así que toma nota dos eventos que figuran no programa que deu a coñecer o Concello de Cedeira:
Sábado, 10 de agosto
• Pregón
• Entroido de Verán
• Festa da Escuma
Domingo, 11 de agosto
• Verbena co Grupo Claxxon
Luns, 12 de agosto
• Collectif Primavez: "Laisse moi"
• Música con Black Bigstage
Martes, 13 de agosto
• Circo e danza con "361º"
• Verbena coa orquestra París de Noia
Mércores, 14 de agosto
• Teatro
• Verbena coas orquestras Los Satélites e Orixe
Xoves, 15 de agosto (Día de Nosa Señora do Mar)
• Misa cantada
• Concerto Banda de Música Vila de Cedeira
• Verbena con Bomba e Finisterre
• Fogos artificiais
Venres, 16 de agosto
• Misa
• Procesión marítima
• Concerto de Guadi Galego
• Música con Banda Xangai
Sábado, 17 de agosto
• "Xira" en Santo Antón de Corveiro
• Verbena con La Ocaband
E aquí podes descargar o Programa das Festas de Cedeira 2024.
Tradicións nas festas de Cedeira 2024
O pistoletazo oficial de inicio das festas de Cedeira márcao o pregón, que en 2024 corre a cargo do Club de Remo de Cedeira, acompañado da asociación Buxainas. Terá lugar o sábado 10 de agosto ás 20:00 h.
Ese mesmo sábado, celébrase tamén o Entroido de Verán, unha das citas máis concorridas e divertidas da celebración. Só hai dúas condicións para participar: acudir disfrazados e ter ganas de pasalo ben. Por suposto, non faltarán as charangas.
O venres 16 de agosto, quenda para o evento máis solemne e cargado de devoción das festas de Cedeira: a misa e posterior procesión marítima, coa patroa, a Nosa Señora do Mar, como gran protagonista. Portada aos ombreiros por integrantes da Confraría da Virxe do Mar e Santa Ana, a imaxe percorre o camiño entre a igrexa e o peirao, acompañada de numerosos fieis e da Banda de Música Vila de Cedeira, antes de ser embarcada e iniciar o seu tradicional periplo marítimo ante a atenta mirada de centos de veciños e visitantes.
O sábado 17 de agosto, a romaría e a popular "Xira" en Santo Antón de Corveiro, con liturxia relixiosa e comida campestre na contorna da ermida, pechan ao grande unhas festas cedeirenses repletas de tradición e de animación.
Concertos nas festas de Cedeira 2024
No apartado musical, no 2024 hai unha cita especialmente destacada: o concerto da artista local Guadi Galego. A cantante e compositora, "Premio Martín Códax da Música á Mellor Canción de Autora" en 2024 e 2026, tocará na súa localidade natal algúns dos seus temas máis coñecidos, encabezados por "Cedeira", dedicado á súa vila. Estará acompañada da banda Xangai, grupo no que figuran algúns dos artistas máis recoñecidos do rock bravú.
Ademais, a música soará en Cedeira cada noite do 10 ao 17 de agosto grazas a actuacións como a de Black Bigstage e a orquestras como Los Satélites ou París de Noia.
Así que non falta de nada nas festas de Cedeira 2024 para gozar ao grande. Apúntaste?
Fonte imaxe cabeceira: Canal Youtube de Daruason Torres.