Do 28 ao 31 de agosto ten lugar a Festa Normanda de Foz 2025, coa que se rememora o errado desembarco viquingo na localidade. E faino cun completo programa de actividades no Campamento Normando ou na praia de Tupide, onde se celebra a Gran Representación do Ataque Normando. Consulta aquí todo o programa da Festa Normanda Foz 2025.

Programa da Festa Normanda de Foz 2025

Fiesta Normanda de Foz 2025

Imaxe: Festa Normanda Foz

A Festa Normanda de Foz celébrase dende o ano 2011 e trasládanos ao século X, cando as costas galegas eran arrasadas polos normandos. A localidade mariñá foi unha das que sufriu un intento de desembarco viquingo, aínda que non frutificou. Agora lembran aquela época e, de paso, honran ao que a lenda popular considera o seu heroe salvador, o "Bispo Santo".

O programa da Festa Normanda de Foz 2025 comeza o xoves 28 de agosto coa apertura do Mercado Normando no Paseo da Ribeira e finaliza o domingo 31 de agosto.

Catro días de celebracións onde non faltan as representacións teatrais, a música, os pasarrúas, as exposicións, os talleres, os xogos populares, a gastronomía… e, sobre todo, a Gran Representación do Ataque Normando na praia de Tupide.

A Asociación Desembarco Normando deu a coñecer todos os detalles do programa da da Festa Normanda de Foz 2025, que che contamos por aquí para que goces do desembarco viquingo Foz 2025.

No programa podes ver a localización de cada actividade por zonas:

Xoves, 28 de agosto

  • 20:30 h. Praza Conde de Fontao: pregón de Pepe Peinó.
  • 20:30 h. Apertura do Mercado Normando no Paseo da Ribeira.
  • 21:00 h. Festival Folclórico: O Feitizo, Pandereteiros do Inferno e Chingla.

Venres, 29 de agosto

  • 12:00 h. Paseo da Ribeira: Apertura do mercado.
  • 12:00 - 13:30 h. Zona 3: Historia da vida cotiá e oficios da época.
  • 16:30 - 20:00 h. Zona 3: Historia da vida cotiá e oficios da época.
  • 20:00 h. Zona 2: Pasarrúas de Ruxe Ruxe.
  • 20:30 h. Zona do Bispo Santo: representación teatral da Lenda de San Gonzalo, a cargo de Marta Pérez, e nomeamento do “Focego Maior”.
  • 22:00 h. Zona de Bispo Santo: cea normanda de Cocho ó Espeto.
  • 22:30 h. Pasarrúas de Louband dende a Praza Conde de Fontao (zona 2) ata o recinto normando (zona 4).
  • 23:30 h. Recinto normando, zona 4: Cosme Deejay.

Sábado, 30 de agosto

  • 11:00 h. Apertura do mercado.
  • 11:00 - 13:00 h. Zona 4: Historia da vida cotiá e oficios da época.
  • 12:00 h (durante todo o día). Pascarrúas e concertos de Upsala e Axeigo.
  • 13:00 h. Praia de Tupide, zona 1: Gran Representación do Ataque Normando. A continuación, sesión vermú.
  • 17:30 - 20:00 h. Zona 4: Historia da vida cotiá e oficios da época.
  • 18:00 h. Tupide, zona 1: Xogos Normandos.
  • 19:00 h. Pasarrúas de Kombarullo dende Tupide ata a Praza Conde de Fontao.
  • 20:00 h. Praza Conde de Fontao, zona 2: Charanga Támega.
  • 23:00 h. Pasacarrúas de Kombarullo dende a Praza Conde de Fontao ata Tupide.
  • 23:45 h. Zona 4: Preparación ritual Funeral Normando.
  • 00:00 h. Praia de Tupide, zona 1: Funeral Normando e espectáculo pirotécnico de Trip Malabar, acompañados de Upsala.
  • A continuación, no recinto normando: sesión de DJs con Anxo Silva e MRJ.

Domingo, 31 de agosto

  • 11:00 h. Apertura do mercado.
  • 11:00 - 13:30 h. Zona 4: Historia da vida cotiá e oficios da época.
  • 11:00 - 13:30 h. Zona 4: "O traballo textil da época: cardado, fiado e tecido".
  • 13:00 h. Mercado Normando: pasarrúas de Ruxe Ruxe.
  • 17:30 h. Praia de Tupide: Desembarco Infantil.
  • A continuación, na Praza Conde de Fontao: festa da escuma.
  • 19:00 - 20:00 h. Mercado Normando: pasarrúas de Ruxe Ruxe.

Desembarco Viquingo Foz 2025

O Desembarco Viquingo Foz 2025 conta con dúas representacións históricas estelares.

A máis vistosa é a representación do Ataque Normando, que ten lugar o sábado na contorna da praia de Tupide. Alí rememórase o errado desembarco e afundimento dos barcos viquingos.

Ataviados con vestimenta da época, veciños e voluntarios escenifican aguerridos combates sobre a area e a praia. Especialmente vistosas resultan as recreacións de naves viquingas.

E a outra grande escena histórica da Festa Normanda de Foz 2025 representa o venres, en forma de obra teatral, o milagre de San Gonzalo que impediu a incursión. Agora che contamos quen é San Gonzalo e cal é a súa lenda.

Agora contámosche quen é San Gonzalo e cal é a súa lenda.

A lenda de San Gonzalo

festa normanda foz barcos
Imaxe: Foto de Ramón Fraga López - Festa Normanda Foz

Nunha época na que as invasións viquingas se repetían no Reino de Galicia, unha gran frota normanda tentou arribar á costa de Foz.

Por aquel entón, o bispo de San Martiño de Mondoñedo era Gonzalo, un home moi respectado e querido polos veciños.

Di a tradición popular que San Gonzalo, xa vello e enfermo, guiou ao pobo de Foz ata o alto dun monte para salvalo do inminente saqueo das hordas viquingas que estaban a piques de desembarcar na costa.

Dende alí arriba, San Gonzalo e os focenses vían chegar a impresionante frota invasora; asustados e indefensos, comezaron a rezar. Entón, o ceo nubrouse e comezou unha forte tempestade que foi afundindo unha a unha as naves viquingas.

Nese mesmo lugar, o Alto da Grela, eríxese hoxe a capela de San Gonzalo (o "Bispo Santo") e celébrase unha tradicional romaría.

E, dende 2011, a errada invasión viquinga recórdase tamén coa popular Festa Normanda en Foz, que suma actividades e adeptos cada ano.

Non perdas a Festa Normanda de Foz 2025, do 28 ao 31 de agosto; que pecha o programa festivo de agosto, que comezou coas Festas de San Lourenzo Foz 2025.

Fonte imaxe cabeceira: Pablo Cid Gómez - Festa Normanda Foz.