Se hai algo que une a hípsters e paisanos por igual é, sen dúbida, o viño. O teu móbilR converterache en experto, nivel catador, con estas apps de viños. Fotografa a etiqueta dunha botella e descubre as súas castes, notas de cata, prezo, maridaxe perfecta e moito máis. E non nos esquezamos dos viños de aquí, descubre as rutas dos viños de Galicia e síntete como en Falcon Crest . R recomenda o consumo responsable.
ENOTURISMO Galicia
App de Turgalicia para dar a coñecer as rutas do viño das cinco denominacións galegas: Ribeiro, Rias Baixas, Ribeira Sacra, Valdeorras e Monterrei. Pasea entre viñedos, cal Angela Channing , coñece a súa historia, visita as adegas e, sobre todo, saborea un bo mencía ou godello. Experiencia 100% recomendable.
Vivino: Escáner de vinos
Fai unha foto da etiqueta dun viño e descubre prezo, valoracións, recensións ou maridaxe procedentes de máis de 10 millóns de usuarios. Pero ademais, podes atopar as mellores ofertas e comprar online, descubrir tendas de viños próximas ti, facer a túa propia lista de viños favoritos, puntuar e compartir.
Wine-Searcher
O mellor buscador de viños no teu móbil. Busca o nome dun viño ou escanea a etiqueta do que che interesa saber as súas variedades de uva, produtores, prezos e críticas. Garda os teus viños favoritos e anota os teus comentarios acerca deles. A app indícache tendas próximas a ti, prezos e ata venda online. Así saberás que tempranillo non é levantarse temperán .
El Sommelier vinos y maridaje
Non sabes con que viño acompañar unha carne asada? Déixate aconsellar polo Sommelier e acertarás. Selecciona un prato da lista e a app dirache o tipo de uva que mellor lle vai e o viño ideal para acompañalo. Ademais das castes, móstrache unha listaxe de viños e o seu prezo. Deixarás coa boca aberta o teu cuñado na próxima comida familiar .
Dispoñible para Android
Hello Vino: Wine Assistant
O teu asistente virtual de viño que responde as preguntas máis habituais para os non expertos en viño. A app aprenderá dos teus gustos para facer as recomendacións máis acertadas. Accede a unha guía con centos de variedades valoradas por profesionais do sector, atopa as maridaxes perfectas e almacena as etiquetas dos caldos que máis che gustaron.
ViWine. Elegir vino en restaurantes y tiendas
App ideal para ir de viños. En ViWine atoparás tendas e restaurantes próximos a ti, pero sobre todo unha axuda inestimable cando queiras pedir ou comprar unha botella de viño. Define os teus gustos e Viwine móstrache unha lista para que che sexa máis fácil elixir. Revisa as valoracións e comparte a túa propia experiencia.
Vinomanos - El vino en tu mano
Profesionais do xornalismo de viños asesórante sobre cal é o máis adecuado para cada ocasión. A guía de viños arxentinos máis completa con novidades e recomendacións. Funciona mesmo sen conexión a internet.
Delectable Wine - Scan & Rate
Fai unha foto da etiqueta dun viño e obtén de inmediato toda a información. A través desta app poderás seguir aos principais sumillers e enólogos, que seguro postean verdadeiras xoias para o teu padal.
Toast Wine
Farto de anotar nun papel o nome dese viño tan rico que acabas de probar? Esta app é a túa solución. Garda e comparte os teus viños favoritos, descobre viños similares e recomendacións doutros usuarios. Ademais, Toast ofrece consellos prácticos sobre como almacenar as botellas ou como servir o viño.
Guía Vinos Gourmets 2018 Lite
A guía máis completa do mundo do viño editada polo Grupo Gourmets. Ideal para elixir un viño, visitar unha adega ou coñecer festas do viño. Nesta edición, 23 profesionais en activo analizaron máis de 4.300 viños en cata cega. Poderás atopar viños por filtro de prezo ou por puntuación.
Bodegas de España – Vinos
Máis de 300 adegas se atopan detrás desta app, na que podes coñecer todo sobre as adegas, variedades, denominacións, notas de cata, noticias, ofertas e moito máis.
Dispoñible para Android
Con este bo sabor de boca, tecnolóxico e con toques de 4G mesturados con wifi, despedímonos emprazándoche a probar estas apps. Encherás o teu móbilR de sabor .
Lembra que podes seguir a nosas novidades en Twitter, Facebook, Instagram e na nosa canle de Telegram.
Ata a próxima!