Unha das grandes citas gastronómicas do outono en Galicia é a Festa da Faba de Lourenzá. Unha homenaxe a un produto de primeira calidade acompañada dun amplo programa de actividades para toda a familia. En 2024, a Festa da Faba de Lourenzá celebrarase dende o venres 4 ata o domingo 6 de outubro.
Se che apetece gozar dunha fantástica combinación de gastronomía e actividades lúdico-festivas, non perdas de vista a Festa da Faba de Lourenzá.
Neste ano 2024 celébrase a edición número 32 dunha Festa de Interese Turístico Galego (dende o ano 2000) que cada ano atrae a miles de visitantes aos arredores e ao claustro do mosteiro de San Salvador de Lourenzá.
Programa da Festa da Faba de Lourenzá 2024
Inicialmente, a cita concentrábase nun único día, o primeiro domingo de outubro, pero dende 2003 ocupa toda unha fin de semana e conta cun amplo abanico de actividades para todos os gustos.
Así que, durante tres días, do 4 ao 6 de outubro, Lourenzá desfrutará da súa Festa da Faba 2024.
E aquí che resumimos algunhas das citas máis destacadas da Festa da Faba de Lourenzá 2024.
Venres, 4 de outubro
- 20:30 h: Cata comentada de viño a cargo da adega Alán de Val
- 22:30 h: Verbena coa orquestra Montreal e DJ Cosme
Sábado, 5 de outubro
- 11:00 h: Apertura da Festa da Faba de Lourenzá 2024
- 12:00 h: Pregón de Amanda Gasalla Gasalla
- 12:30 h: Showcooking a cargo do cociñeiro Judicael Romero
- 13:30 h: Degustación popular
- 17:00 e 18:30 h: Obradoiro infantil de cociña
- 19:00 h: Actuación da Banda de Música de Foz
- 22:30 h: Verbena coa orquestra Salsarena
Domingo, 6 de outubro
- 08:30 h: Apertura do mercado da Faba de Lourenzá ao por maior
- 10:00 h: Apertura das casetas dos "fabeiros"
- 11:00 h: X Vespafaba & Clásicos
- 12:30 h: Fala Faba
- 13:30 h: Faba Bingo
- 18:30 h: Festival Folclórico
- Clausura da Festa da Faba de Lourenzá 2024
Cartel da Festa da Faba de Lourenzá 2024
O cartel anunciador da Festa da Faba de Lourenzá 2024 é obra do artista de O Valadouro Xosé Blanco.
Representa as fabas e as fabeiras e tamén recorda á tradición laurentina, cunha imaxe do Rei Charlo portando una ramiña de fabas.
Pregón da Festa da Faba de Lourenzá 2024
A Festa da Faba de Lourenzá arranca co pregón.
Este ano 2024, a pregoeira será Amanda Gasalla Gasalla, maestra xubilada que durante dúas décadas exerceu a súa labor en Lourenzá. Unha bonita maneira de homenaxear ás maestras rurales que fan o seu traballo con gran pasión malia os escasos recursos.
Actividades da Festa da Faba de Lourenzá
Tras o pregón, animación, música e gastronomía combínanse nun evento perfecto para gozar e degustar.
Na Festa da Faba triunfan os postos de venda de fabas, moitos deles casetas rústicas de madeira e lona, as catas e degustacións e os talleres de cociña e showcookings. Nos postos de hostalería laurentinos, as tapas de fabas son unha delicia moi cobizada.
Pero, ademais de fabas, hai sitio para viño, queixo ou embutidos e cóntase con mercado de artesanía, exposicións, actividades infantís, xogos tradicionais, maxia, teatro, recitais de poesía e música, con espectáculos de danza, concertos, pasarrúas e verbena.
O programa de actividades da Festa da Faba inclúe tamén concentracións e mostras de vespas e vehículos clásicos.
A carreira "Val das Fabas" e o "Concurso de Fotografía"
Tampouco falta o deporte, coa tradicional carreira "Val das Fabas", que xa supera as dez edicións.
Unha das citas que máis adeptos/as está a cultivar é o Concurso Fotográfico da "Festa da Faba". Cada ano céntrase nun tema diferente, aínda que sen perder de vista a famosa faba, e, nas últimas edicións, xa reuniu a máis de 120 participantes.
Lourenzá, terra de fabas
Un tren turístico lévate por diferentes localizacións de Lourenzá nas que coñecerás máis sobre esta localidade lucense e sobre o cultivo do seu legume estrela.
Porque a Faba de Lourenzá é un legume de altísima calidade cuxa fama traspasa fronteiras e que actualmente xa podes atopar en mercados de grandes cidades como Madrid ou Barcelona.
Para que te fagas unha idea, os datos actuais sobre o seu volume de transaccións falan de 600 toneladas anuais.
E cal é a historia da popular Festa da Faba de Lourenzá?
Historia da Festa da Faba de Lourenzá
O mercado de fabas de Lourenzá está documentado dende o século XVIII. Documentos do Arquivo de Xeografía Xeral do Reino de Galicia din: "Todo se cultiva aquí, podendo afirmarse sen esaxeración que é o val de Lourenzá o xardín da provincia; e que en 1787 existían fanegas de fabas".
Pero foi nos anos 70 e 80 cando o cultivo da faba experimentou un notable incremento e se converteu nun dos grandes motores económicos da comarca.
Este é o contexto no que nace, xa en 1990, a Festa da Faba.
Evolución da Festa da Faba de Lourenzá
Inicialmente tratábase dun concurso de fabas e detrás da iniciativa estaba o Concello de Lourenzá, que quería promocionar o consumo e, de paso, incrementar o seu prezo.
Reivindicar a Faba de Lourenzá como un produto de calidade e proxección de futuro; apoiar aos colectivos de fabeiros, hostaleiros e comerciantes locais; e dar a coñecer os bens patrimoniais e culturais do val de Lourenzá, unha zona marcada polo cultivo e a comercialización da faba, eran, e seguen sendo, os grandes obxectivos da celebración gastronómica.
E o mellor momento para celebrar esta festa é outubro, coincidindo coa época de recollida das fabas en Lourenzá.
Como é a Faba de Lourenzá
Lourenzá está situada na Mariña de Lugo. Unha zona caracterizada polas choivas abundantes, unhas temperaturas suaves cuxa media anual oscila entre os 12 e os 14 graos e uns chans francos e franco-fangosos idóneos para as fabas. Se a iso lle sumas o uso de técnicas tradicionais de cultivo, o resultado son fabas de excepcional calidade, recoñecidas coa Indicación Xeográfica Protexida Faba de Lourenzá.
A Faba de Lourenzá segue un rigoroso proceso de selección, almacenamento e conservación e en ningún momento do proceso se lle engaden ingredientes ou elementos químicos.
Tras a inicial limpeza e criba, introdúcese nunha cámara frigorífica durante polo menos 48 horas, antes de almacenarse en lugares frescos para ser envasada.
Variedades e venda da Faba de Lourenzá
A Faba de Lourenzá conta con dúas variedades principais: a Faba Galaica, a de maior tamaño, e a Faba do Marisco.
Ambos os dous tipos son pastosos e sen grumos e os seus grans permanecen enteiros, sen desprenderse da súa pel na cocción.
As Fabas de Lourenzá véndense a granel, secas ou verdinas, e separadas da súa vaina, enteiras e limpas.
Ruta da Faba de Lourenzá
Tanto se queres comprala coma se queres descubrir máis sobre ela, recomendámosche a Ruta da Faba de Lourenzá.
A Ruta da Faba de Lourenzá combina excursións guiadas polo patrimonio histórico artístico da localidade con degustacións gastronómicas, talleres e visitas ás plantacións de fabas.
Toda unha experiencia gastronómica e cultural que podes gozar en familia e que che servirá para anticipar, ou completar, a túa visita á Festa da Faba de Lourenzá.
Fonte imaxe de cabeceira: A Mariña lucense