Volven os monólogos R, o humor “do país”

Imaxina a Touriñán protagonizando o famoso anuncio de Lola Flores. Seguro que diría algo como: “Ti sabes por que a min entendéuseme en todo o mundo? Pola retranca”. É que en Galicia temos un humor moi noso, como o son, logo de 15 anos, os monólogos R.

É que os monólogos R convertéronse nun aceno máis da nosa identidade, unha forma diferente de facer as cousas, unha maneira de manternos preto de ti e darche as grazas por ser cliente/a.

E como non podía ser menos, os monólogos R son tamén un medio para poñer en valor o humor “do país” a través de eventos multitudinarios onde as risas a esgalla están garantidas.

Prepara o clínex, porque vas chorar de risa, e isto arrinca xa.

monólogos R 2023

Dúas cidades, cinco monologuistas e miles de gargalladas soando ao unísono. Dismo ou cóntasmo? Estas son as datas da xira 2023 de monólogos R:

• domingo 19 de marzo, ás 17:00 h. e 20:30 h. en Palexco da Coruña. Con Xosé A. Touriñán, Celso Sanmartín e Lucía Veiga.

• domingo 26 de marzo, ás 20:00 h. no Auditorio ‘Mar de Vigo’. Con Carlos Blanco, Pepo Suevos e Lucía Veiga.

E que estarán “argallando” estes xenios do humor? Non podemos dicirche nada, só que che vas esmendrellar de risa.

Os monologuistas irrepetibles da canteira galega

En Galicia podemos presumir de moitísimas cousas e, dende logo, cómicos irrepetibles temos para dar e tomar.

E a súa retranca, a súa faísca e as súas táboas no escenario traspasan fronteiras.

Acompañounos nunha chea de monólogos R. “Touri” fixo de todo dende que empezou a triunfar como actor e humorista en As Cantareiras de Ardebullo xunto a Marcos Pereiro. Meteuse na pel do fillo de Manuel Charlín na serie e obra de teatro “Fariña”, protagonizou a escangallante película “Cuñados” e ata percorreu “Rutas bizarras” con Marta Hazas en La 2.

Coñecido como “Celsiño”, ten un pouco de filósofo de carreira, poeta e contacontos; pero, sobre todo, é un contador de historias nato. E leva narrando estas memorias, ligadas moitas á tradición oral galega, dende hai anos polos escenarios de toda Galicia.

É actriz, monologuista, presentadora de televisión e o que lle boten. Estivo magnífica en papeis dramáticos, como o de Norma na exitosa serie “Rapa”, que se suma á longa lista que interpretou na súa carreira, como “Vivir sin permiso”, “Serramoura” ou “El desorden que dejas”. E tamén sabe facer rir como ninguén. Lucía é a outra metade das Izquierdo Sisters con Marita Martínez, que percorren salas de toda Galicia con moito humor.

Pode encher páxinas e páxinas co seu currículo. Presentou unha infinidade de programas de televisión, fixo moito teatro e actualmente está de xira co seu amigo ‘Touri’ con “Somos criminais 3”. En cine destaca a súa interpretación na premiada “Dhogs”, despois de participar en películas como “La playa de los ahogados”, “O Apóstolo”, “Volver”, ... E se falamos se series non acabariamos hoxe: “La Unidad”, “Los favoritos de Midas”, “Los reyes de la noche”, “Fariña”, … sen esquecernos de personaxes tan lembrados como Ladislao de “Mareas Vivas”.

Preséntase como “cómico, actor, guionista... o que sexa menos traballar”. É que humor lle sobra a este monologuista, que percorreu toda Galicia con miles e miles de actuacións. É un dos intérpretes da premiada “As bestas”, tamén o vimos na película “Quen a ferro mata” ou “Entre bateas”, entre outras moitas cintas. Series, a fartar, como “Fariña”, “Aquí Paz y después Gloria”, “Matalobos”, ...

Consigue a túa entrada para os monólogos R nas nosas redes

Non perdas de vista as nosas redes sociais porque sorteamos invitacións para que nos acompañes nas dúas cidades da xira 2023 de monólogos R.

Entra xa, porque podes conseguir unha das 5 entradas dobres en xogo para os monólogos da Coruña e Vigo: Facebook, Instagram ou Twitter.

Ver esta publicación en Instagram

Una publicación compartida de R (@os_de_r)

Máis dunha década compartindo monólogos contigo

Para ser exactos, 15 anos levamos compartindo contigo risas nos monólogos R.

Empezamos en 2008 e dende entón viramos por 30 localidades e as butacas de toda Galicia enchéronse con preto de 43.700 asistentes. Un éxito absoluto, do que teñen toda a “culpa” os/as grandes monologuistas que nos acompañaron.

Durante todos estes anos rímonos a gargalladas con: David Amor, Isi, Pepo Suevos, Carlos Blanco, Rober Bodegas, Marcos Pereiro, Federico Pérez, Javier Veiga, Víctor Grande, David Perdomo, Isa Risco, Marita Martínez, Xosé A.Touriñán e Oswaldo Digón. E nesta edición únense ao grupo Celso Sanmartín e Lucía Veiga.

Mesmo nos peores momentos quixemos sacarche un sorriso. Por iso, na pandemia reinventamos o formato dos monólogos R para levalos directamente á túa casa a través da televisión.

Volven un ano máis os monólogos R e estamos desexando verte.

Que o goces a tope!