Festa da Coca de Redondela 2023
Galicia está chea de festas e de celebracións que mesturan o mitolóxico e o pagán co relixioso. Unha unión que é case perfecta en Redondela. Todos os anos na celebración do Corpus Christi integran un dragón nos seus actos debido a unha lenda ancestral. Un dragón que sae en procesión e desfila na chamada “Festa da Coca“.
Cando a festa xa se coñece co nome do dragón mitolóxico é porque xa ten todo o protagonismo. Cada ano, a vila de Redondela conmemora a valentía e a bravura dos seus veciños para vencer o dragón, comunmente coñecido coma a Coca, coincidindo cunha das principais festas relixiosas do ano, o Corpus. Pero, de onde vén a lenda do dragón da Festa da Coca?
Imaxe: Turismo de Redondela
Os mariñeiros que salvaron Redondela da Coca
A celebración da Festa da Coca de Redondela xira arredor da lenda dun dragón que levaba as nenas da vila á súa guarida. O dragón vivía nas augas que rodeaban a illa de San Simón. De cando en vez achegábase á vila mariñeira destruíndo todo o que atopaba ao seu paso e secuestrando as veciñas máis novas.
Os mariñeiros do lugar, fartos do dragón, decidiron cazalo coas súas espadas. Despois dunha longa batalla, saíron vitoriosos. Unha vez morto o animal, rescataron as súas prisioneiras e levaron o corpo da Coca ao centro da vila, onde os mariñeiros, agarrados das espadas, comezaron a bailar con alegría arredor do monstro morto.
Todos os anos, no desfile de Corpus Christi, Redondela celebra a vitoria sobre a Coca e a liberación das máis pequenas do lugar desfilando polas rúas coa figura do dragón e interpretando a “Danza das Espadas e das Penlas”.
Cando ver a “Danza das Espadas e das Penlas”
Para poder ver todo o espectáculo da “Danza das Espadas e das Penlas” terás que asistir ás Festas da Coca. Durante o percorrido das procesións os danzantes bailan algunhas figuras ao son da banda de música.
Despois da misa do día de Corpus, a procesión realízase sobre as alfombras florais que os veciños da vila estiveron confeccionando a noite anterior. En determinados espazos do percorrido realízase o baile e en lugares concretos realízanse as diferentes coreografías.
Imaxe: Turismo de Redondela
Que son as Penlas?
Xunto aos bailaríns, un grupo formado por vinte e cinco mozos, bailan as “Penlas”, dúas nenas, de entre tres e cinco anos, vestidas de branco e cunhas pequenas ás nas costas. Fano sobre os ombreiros das “burras”, dúas mulleres que simbolizan as súas nais e que tradicionalmente eran panadeiras da vila. Tiñan este privilexio porque pertencían ao gremio que facía o pan de Corpus.
Os bailaríns visten unha camisa e pantalóns brancos, zapatillas brancas e unha banda. Ademais, levan unha faixa de distintas cores, vermella ou verde, segundo a posición que ocupen. Os catro últimos, coñecidos como “abaelas” ou “rabelos”, levan unha faixa azul.
Xunto a esta indumentaria, os danzantes levan espadas (en alusión á danza dos mariñeiros que derrotaron a Coca) e castañolas. As figuras que executan a danza de espadas son ao redor de dez, e algunhas teñen nomes como a “reverencia”, o “pase en cadea”, o “camiño de Santiago” ou a “estrela”.
A música que acompaña o baile está formada por unha gaita e un tambor. Ademais do xoves, a “Danza das Espadas e das Penlas” volve representarse o domingo, desta volta en Vilavella.
Imaxe: Turismo de Redondela
A orixe do nome do dragón: Coca
Existen varias teorías sobre por que o dragón se chama Coca. Algúns historiadores sitúano no termo latino “cocatrix”, que significa crocodilo, baseándose en documentos do século XV. Tamén existe a opinión de que a Coca ten a súa orixe no coco ou monstro infantil, e outros estudosos relacionan a besta co xigante de tres cabezas “Caco”, fillo de Vulcano.
Só a cabeza da recreación da Coca que desfila polas rúas de Redondela se conserva tal e como aparecía nas fotografías dos anos 20. A figura da criatura sufriu diversas restauracións e melloras ao longo da súa existencia.
Programa da Festa da Coca de Redondela 2023
As Festas da Coca de Redondela comezan sempre o día antes do Corpus, é dicir, empezan sempre un mércores e duran ata o domingo. Aínda que o gran día é o xoves, todos os días hai un programa variado para toda a familia.
Mércores, 7 de xuño
17:45 Desfile de Xigantes y Cabezudos acompañados polo grupo de gaitas Airiños de San Simón.
19:30 Praza del Concello: Orquestra de Saxos de Redondela.
20:00 Praza del Concello: lectura do pregón a cargo das SARILLAS, (equipo de veteranas do club SAR de Redondela), acto solemne do Relevo de Burras, Homenaxe aos alfombristas, Homenaxe de Danza de Espadas e acendido da iluminación da festa.
22:00 Campo da Feira: concerto do Grupo América.
Confección das alfombras florais.
Xoves, 8 de xuño
11:00 Traslado da Virxe “A Gabacha” da igrexa de Vilavella á igrexa de Santiago, acompañada pola Danza das Espadas, das Penlas e a Banda de Música de Redondela.
12:00 Desfile da Coca cos Mordomos e Dianiños acompañada por Xigantes e Cabezudos e o grupo de gaitas Sons do Castro.
12:00 Igrexa de Santiago de Redondela: Misa Maior
13:00 Procesión polas rúas adornadas coas alfombras de flores, xunto á Banda de Música de Redondela e A Danza das Espadas e das Penlas na praza da Constitución.
18:00 Alameda de Castelao: Banda de Música Municipal de Redondela.
22:00 Campo da Feira: Orquestra Saudade.
Venres, 9 de xuño
10:30 Alborada a cargo da Banda Municipal de Redondela.
11:30 Retorno da Virxe “A Gabacha” acompañada pola Banda Municipal de Redondela.
17:00 a 20:30 Pista da Xunqueira e Alameda de Castelao: Balonmán na rúa.
21:00 Campo da Feira: RMS.
22:00 Campo da Feira: Los Motores.
23:15 Campo da Feira: Sínkope.
01:00 Campo da Feira: Obús.
Sábado, 10 de xuño
11:00 Alborada a cargo da Banda Municipal de Arcade.
18:00 Alameda Castelao: Banda de Música de Arcade.
21:00 Campo da Feira: Orquestra Gran Parada.
00:00 Campo da Feira: Chaleco Reflectante.
01:15 Campo da Feira: Bombay.
02:30 Campo da Feira: Sesión DJ Rodri Vegas.
Elaboración das Alfombras Florais nas rúas de Vilavella.
Domingo, 11 de xuño
11:00 Alborada a cargo da Banda Municipal de Chapela.
12:00 Desfile da Coca cos Mordomos e Dianiños acompañada por Xigantes e Cabezudos e o grupo de gaitas O Carballo das Cen Pólas.
12:00 Misa na igrexa de Vilavella. Procesión polas rúas acompañadas polas Danzas das Espadas, das Penlas e a Banda de Música de Chapela. Baile de homenaxe da Danza das Espadas e das Penlas na praza de Ponteareas en na praza de Ribadavia.
18:00 Alameda Castelao: Banda de Música de Chapela.
22:00 Campo da Feira: Orquestra Cinema.
