Dos 1.121 sitios declarados Patrimonio Mundial, 48 están en España e, entre eles, 4 en territorio galego. Queres saber todos os lugares Patrimonio da Humanidade en Galicia? Adiantámosche que o Camiño de Santiago é un deles. Descubre a lista completa dos sitios que a UNESCO declarou Patrimonio da Humanidade en Galicia e que, por tanto, debemos preservar para as xeracións futuras.
E é que o Patrimonio da Humanidade, ou Patrimonio Mundial, son todos eses bens materiais ou inmateriais declarados pola UNESCO, considerados de interese da comunidade internacional. Esta organismo indica que son bens que, polo seu destacado valor cultural, natural ou histórico, se consideran de especial relevancia para toda a humanidade.
Repasamos eses bens e lugares Patrimonio da Humanidade en Galicia por orde cronolóxica de declaración.
Cidade Vella de Santiago de Compostela (1985)
Foi o primeiro de toda Galicia en acadar o recoñecemento como Patrimonio da Humanidade. Foi en 1985 cando o casco histórico de Santiago de Compostela e a súa catedral, un dos lugares máis emblemáticos de Galicia, entraron no selecto grupo da UNESCO.
O atractivo do casco histórico da capital galega radica non só no seu gran valor artístico, senón tamén na súa importancia histórica, xa que tivo unha grande influencia no desenvolvemento da arte e da arquitectura no norte da Península durante o período da época románica e barroca.
A UNESCO recoñece Santiago de Compostela como un dos lugares de peregrinación máis famosos do cristianismo e unha das zonas urbanas máis fermosas do mundo, realzada polos seus monumentos románicos, góticos e barrocos. Por iso é Patrimonio da Humanidade en Galicia.
A organización internacional destaca da cidade vella de Santiago, que se concentra ao arredor da catedral, o sepulcro do apóstolo Santiago, ao que se accede polo magnífico Pórtico da Gloria. Imprescindible e visitado por milleiros de persoas cada ano.
Camiño de Santiago de Compostela: Camiño Francés (1993) e Camiños do Norte de España (2015)
Xa fai 30 anos, en 1993, que o Camiño de Santiago foi declarado Patrimonio da Humanidade. E o máis salientable é que conseguiu ampliar nos últimos anos as rutas recollidas na súa declaración.
No ano Xacobeo 1993, a UNESCO incluíu na lista o Camiño Francés de Santiago. Por primeira vez incluíuse todo o itinerario dende os Pirineos ata a capital galega.
O Camiño de Santiago marcou, aínda que moitos non o saiban, un fito para a UNESCO, que supuxo un cambio total dentro do sistema de catalogación do Patrimonio da Humanidade, xa que ata ese momento só as cidades ou conxuntos monumentais recibiran tal distinción.
Máis de 300.000 peregrinos chegan cada ano a Compostela facendo o Camiño de Santiago, que conta con máis de 12 séculos de historia.
En 1998, a UNESCO ampliou a lista con todas as rutas que viñan de Francia: o Camiño de Santiago de Le Puy, Limoges, Tours e Toulouse. En 2015 concederase esta distinción a todos os Camiños do Norte con catro novas rutas, dúas delas na comunidade galega: o propio Camiño do Norte e o Camiño Primitivo.
Muralla romana de Lugo (2000)
É a muralla máis coñecida de toda Galicia. A única muralla romana en pé na súa totalidade. E, por suposto, é o emblema de Lugo.
Os turistas poden pasear en todo o seu percorrido, entrando por unha das súas 10 portas que dan acceso á zona vella ou casco histórico. A muralla romana de Lugo permanece en pé despois de 17 séculos e é outro dos lugares Patrimonio da Humanidade en Galicia.
A muralla romana de Lugo foi construída polos romanos entre o ano 260 e 310, cando Lucus Augusti era a capital do Convento Xurídico de Lugo.
A súa construción levouse a cabo para defender a cidade dos ataques dos pobos bárbaros, que ameazaban as fronteiras setentrionais do Imperio Romano. En 1921 foi declarado Monumento Nacional e o 30 de novembro de 2000 foi declarado Patrimonio da Humanidade pola UNESCO.
Do legado cultural dos romanos en Lugo tamén se conservan as termas romanas, actualmente declaradas ben de interese cultural de Galicia, e a ponte romana de Lugo, que formaba parte da estrada XIX que unía Lucus Augusti con Bracera Augusta.
E todo isto lémbrase cada ano no Arde Lucus.
Torre de Hércules (2009)
A Torre de Hércules foi declarada Patrimonio da Humanidade en 2009. É o faro romano en funcionamento máis antigo do mundo e o único faro da lista do Patrimonio da Humanidade. A súa altura total é de 55 metros e data de finais do século I e principios do século II.
Antigamente este monumento da Coruña formaba parte dunha gran cadea de faros á que tamén pertencían o Faro de Alexandría (Exipto) e o Coloso de Rodas (Grecia), recoñecidos por Antípatro de Tesalónica (entre 20 a.C. e 20 d.C.) como dúas das sete marabillas do mundo.
A Torre de Hércules, Patrimonio da Humanidade en Galicia, está rodeada por un gran espazo verde chamado Parque de Esculturas da Torre de Hércules.
Trátase dunha zona ao aire libre de 47 hectáreas onde se poden contemplar 15 obras escultóricas, entre as que destacan a figura de Breogán, guerreiro celta ao que se atribuíu a fundación da Coruña; os menhires, un grupo escultórico de 12 pezas; e a Rosa dos Ventos, un mosaico circular de 25 metros de diámetro situado ao pé da Torre.
A pedra en seco (2018)
A finais de novembro de 2018 a UNESCO recoñeceu a pedra en seco como Patrimonio Cultural Inmaterial, unha técnica construtiva tradicional galega que se converte así no primeiro elemento inmaterial que recibe esta distinción en Galicia.
O máis rechamante deste tipo de construcións é que non se utiliza ningún tipo de morteiro para unir a pedra. Conseguiu entrar na lista representativa do patrimonio inmaterial da UNESCO grazas a unha candidatura internacional liderada por Grecia e Chipre, e que tamén incluíu a participación de Suíza, Croacia, Eslovenia, Francia, Italia e España.
Tres novas candidaturas a Patrimonio da Humanidade en Galicia
Os catro bens materiais e un ben inmaterial que ten Galicia como Patrimonio da Humanidade poden chegar a ser en breve máis. A Comunidade galega pode engadir a posible declaración da Riberia Sacra (de Lugo e Ourense), das Illas Cíes (parque nacional das Illas Atlánticas) ou do Ferrol da Ilustración.
Estas tres candidaturas foron admitidas e deberán ser avaliadas polo Consello de Patrimonio Histórico.
Agardamos que en breve os lugares que a UNESCO declara Patrimonio da Humanidade en Galicia pasen de catro a sete e que, xunto á Pedra en Seco, poidamos dar a coñecer toda a beleza, material e inmaterial, que a nosa terra ofrece ao mundo.