A beleza natural de Galicia é un dos seus atractivos máis queridos por propios e visitantes. A orografía galega ofrécenos lugares especiais que coidamos e que se fan coñecidos polas súas peculiaridades. Algúns destes sitios son os miradoiros de Galicia. Puntos dende os que podemos observar o que nos dá a natureza galega.
Recompilamos os mellores miradoiros de Galicia dende os que se poden ver o diversa, diferente e fermosa que é a nosa terra. Ademais, aproveitando a natureza, podes facer rutas por estes miradoiros para descubrir todo o que a nosa comunidade nos ofrece de forma natural.
Miradoiro do Ézaro, Dumbría (A Coruña)
En plena Costa da Morte, no concello de Dumbría, cunha altitud de 274 metros e cunha contorna natural incomparable, o miradoiro do Ézaro ofrece unhas vistas privilexiadas da desembocadura do río Xallas, da praia do Ézaro, das illas Lobeiras e da inconfundible silueta do cabo Fisterra ao fondo.
Dende o miradoiro intúese a fervenza do Ézaro, famosa no seu entorno porque as augas do río Xallas caen desde unha altura de 155 metros ata chegar ao mar, converténdose nun espectáculo único da natureza.
A subida ao miradoiro do Ézaro considérase unha subida curta pero moi dura e esixente no mundo do ciclismo, e foi incluída en varias etapas da Volta a España e nas Series Mundiais UCI Gran Fondo.
Miradoiro de San Roque, Viveiro (Lugo)
Dende o miradoiro de San Roque terás as mellores vistas da ría formada polo río Leandro ou Landrove, coa vila de Viveiro ao fondo, o porto de Celeiro, as praias de Covas, Sacido ou Abrela, as illas de Coelleira e Gaveira, a punta do Fuciño do Porco e mesmo Estaca de Bares.
Atópase a uns 353 metros sobre o nivel do mar e no alto podemos atopar a capela de San Roque, que dá nome ao miradoiro e ao monte. Dende o miradoiro observamos o tramo final do río Landro, que forma unha zona húmida de importante valor ecolóxico.
Miradoiro de Santa Tegra, A Guarda (Pontevedra)
Dende o miradoiro do monte de Santa Tegra hai unhas marabillosas vistas da desembocadura do río Miño e da costa de Portugal. Temos unha panorámica de 360º da fronteira natural entre dous países.
Este miradoiro tamén ten un atractivo cultural máis que as espectaculares vistas. No ano 1913 descubríronse os xacementos do Castro Galaico de Santa Tegra, de máis de 2.000 anos de antigüidade e de máis de 20 hectáreas de extensión. Calcúlase que esta cidade acolleu a preto de 5.000 habitantes e este asentamento converteuse nun dos recursos turísticos e culturais máis visitados das Rías Baixas.
Miradoiro dos Balcóns de Madrid, Parada do Sil (Ourense)
É un dos miradoiros máis populares de Galicia. Este conxunto natural achéganos algunhas das paisaxes máis fermosas do noso territorio. O miradoiro dos Balcóns de Madrid ofrécenos vistas das escarpadas paredes do río Sil, que poden elevarse verticalmente ata 500 metros sobre as augas do río.
Este miradoiro recibe o seu nome dos Balcóns de Madrid por seren testemuñas de como as mulleres se despedían dos seus maridos mentres se dirixían a Madrid para traballar durante décadas pasadas.
A contorna do río Sil ofrece outros moitos miradoiros que podes consultar aquí mesmo:
Miradoiro da Pena do Castelo, San Martiño de Doade (Lugo)
Dende o ano 2001, en pleno centro da Pena do Castelo, existe un miradoiro dende o que podemos gozar de parte dos pétreos Canóns do Sil e das vistas a dúas provincias, coas Terras de Lemos en Lugo e coa Terra de Caldelas en Ourense. E a un lado, en Sober, temos tamén os Montes de Ceceda aos que pertence este Monte do Castelo.
O miradoiro da Pena do Castelo é unha oportunidade única para gozar dunha perspectiva diferente a doutros miradoiros de Galicia, cos famosos socalcos cos viñedos da zona e cunha capela dedicada a San Mauro, construída recentemente despois da desaparición da antiga, a mediados do século XIX.
Miradoiro Val de Valdeorras-Banco da Amizade, Fervenza-Correxais (Ourense)
O miradoiro do Val de Valdeorras ten unhas vistas dende as que se contempla a paisaxe que se estende pola comarca, con montañas e vales cubertos de vexetación, e o río Limia que serpentea polo val.
Recentemente incorporouse a este punto de vista un novo incentivo, o chamado Banco da Amizade. Un banco colocado polos veciños situado nun lugar tranquilo e illado, polo que é un lugar ideal para gozar da natureza e da paz.
Atópase a medio camiño entre a vila barquense de Fervenza e a vila vilamartinés de Correxais. Permite observar unha espectacular panorámica do paso do Sil entre montañas dende unha rocha case no límite entre ambas as dúas parroquias, aínda que en terras do Barco.
Miradoiro de Cabo Ortegal, Cariño (A Coruña)
As vistas desde o miradoiro de Cabo Ortegal son das máis espectaculares de toda a comunidade. A contorna do cabo, situada no concello de Cariño, posúe un gran valor xeolóxico, ornitolóxico e morfolóxico e xa está incluída na listaxe de Lugares de Interese Comunitario Costa Ártabra (LIC).
Dende o miradoiro pódese ver a unión do océano Atlántico e do Cantábrico, co faro ao fondo pódense ver tres illotes chamados Os Aguillóns.
Miradoiro Pedra da Rá, Ribeira (A Coruña)
Dende o alto do monte Castro, a 213 metros sobre o nivel do mar, unha enorme pedra con forma de rá dá nome a este lugar dende o que podemos contemplar as vistas das famosas dunas e do cabo Corrubedo.
O miradoiro da Pedra da Rá utilízase como tal dende os anos 80 cando se construíu unha escaleira de formigón para subir sobre a gran rocha e observar dende alí o océano Atlántico, a enseada de Corrubedo, o seu cabo e as súas dunas, ademais de gran parte do Parque Natural.
As vistas son tan amplas que se contempla a desembocadura da ría de Arousa, a costa de Ribeira e a silueta de varias illas atlánticas, como Ons, Cíes, Sálvora e o illote dos Fornos.
Miradoiro do Fuciño do Porco, O Vicedo (Lugo)
Situado na entrada da ría de Viveiro, o seu nome oficial é Punta de Socastro pero é coñecida como O Fuciño do Porco. Abarca a espectacular paisaxe que se estende dende Xove ata Bares cun percorrido sinuoso que transcorre por pasarelas de madeira con algunhas escaleiras.
Se o paseo en si xa chama a atención polo zigzagueante que é o seu percorrido, chaman aínda máis a atención as súas vistas ao mar Cantábrico e ao océano Atlántico que se estenden cara ao infinito ante a mirada dos seus visitantes.
Miradoiro da Siradella, O Grove (Pontevedra)
Na península do Grove, no extremo sur da ría de Arousa, atopamos un miradoiro no seu punto máis alto, no monte Siradella. Con vistas en 360º pódese contemplar a ría de Arousa, as illas Atlánticas, a praia da Lanzada e o importante Complexo Intermareal Ulla-Umia O Grove.
Ademais, podemos observar, na unión do Grove coa península, unha franxa de terreo que hoxe conforma un dos espazos ambientais máis importantes de Galicia, protexido pola Rede Natura 2.000.
Estes 10 miradoiros de Galicia farán as delicias dos amantes da natureza, pero seguro que hai moitos outros que competirían con eles en beleza e espectacularidade. Non dubidedes en visitalos pero tamén en ampliar esta listaxe.
Fonte imaxe de cabeceira: Turismo de Galicia