A beleza natural de Galicia sorprende cada día a propios e visitantes. Todos temos algún lugar máxico do que nos namoramos polas súas vistas ou pola súa contorna. E os galegos e as galegas fumos capaces de aproveitalo ao máximo colocando bancos para gozar deses espazos. Hoxe seleccionamos os mellores bancos de Galicia coas vistas máis espectaculares.
Podes ser máis praia ou de montaña. Pode que che gusten máis os ríos ou as dunas que as illas ou os montes. Elixir cales son as vistas máis espectaculares ou as que máis che emocionan é cuestión de gustos. Así que toma esta lista dos mellores bancos de Galicia, senta, goza e xa decidirás cal é o mellor.
Banco de Loiba (Ortigueira)
No miradoiro do Coitelo, no concello de Ortigueira (A Coruña), colocaron un banco de madeira alá polo ano 2009. O que non sabían estes visionarios era que anos despois a súa fama non deixaría de medrar e, hoxe en día, 40.000 persoas ao ano chegan a facerse fotos sentados nel, converténdoo nun dos mellores bancos de Galicia. Incluso o Concello de Ortigueira fleta autobuses gratuítos para os turistas que queiran visitar o banco de Loiba (consultalo sempre na web do Concello).
A veciñanza de Ortigueira asegura que a fama comezou arredor de 2010 cando un membro dunha banda de música escocesa, que acababa de actuar no Festival Internacional do Mundo Celta de Ortigueira, escribiu no respaldo do banco: "o mellor banco do mundo".
E tiña razón, xa que o banco do miradoiro de Coitelo, na beira dos acantilados de Loiba (situado entre o Porto de Espasante e o Cabo Estaca de Bares, que é o punto máis setentrional da Península Ibérica), móstranos unha fermosa ría e a súa marisma, a de Ladrido, un dos maiores humidais do norte de España.
Banco do Monte Ventoso (Ferrol)
O banco de Monte Ventoso é coñecido como o banco máis "cuki" do mundo. Hai que dicir que é moderno, feito de palés (reciclar sempre é bo) e cóntase que é un agasallo dun rapaz á súa mellor amiga feito en 2017.
A 246 metros de altura está o miradoiro do Monte Ventoso con vistas á praia de Doniños, á costa de Covas e ao cabo Prior, sobre Prioriño e preto de onde había un observatorio meteorolóxico da Mariña e unha batería costeira.
A panorámica dende este punto de Ferrol é espectacular e para corroboralo están os centos de visitantes que se achegan a el, xa que se converteu nun reclamo turístico onde poder parar e gozar das vistas.
Por iso é un dos mellores bancos de Galicia.
Banco do Campo da Rata (Redondela)
Se imos ás Rías Baixas Baixas galegas, un dos mellores e máis famosos bancos de Galicia, cunhas vistas espectaculares, é o banco do Campo da Rata.
Situado en Cedeira (Redondela), no alto do Campo da Rata, e cravado nunha rocha dende 2015. No seu respaldo leva o lema “Galiza. It’s different”.
Para poder chegar ao banco de Redondela hai que ter en conta que non se pode acceder en coche, polo que haberá que camiñar un pouco, aínda que a subida non é moi difícil e as vistas realmente merecen o esforzo.
Cando chegues ao alto poderás contemplar toda a ría de Vigo, a ponte de Rande, a illa de San Simón, as illas Cíes... e dende alí o que cada quen quere ver.
Banco do Monte Castelo (Viveiro)
No ano 2015, a Comunidade de Montes de Landrove estreou un marabilloso banco no miradoiro de pedra do monte Castelo.
O banco do miradoiro do Monte Castelo, en Viveiro, é case unha recompensa despois dos 11 quilómetros de camiñada ata chegar a el. As vistas merecen a pena: ao fondo o val do Landro e a ría de Viveiro.
O monte Castelo, un dos 15 outeiros que rodean o val do Landro, é un dos espazos naturais máis descoñecidos de Viveiro. Accédese dende a estrada LU-540, en Arredoada, por unha pista forestal, pero o esforzo paga a pena para gozar doutro dos mellores bancos de Galicia.
Banco de Punta Faxilda (Sanxenxo)
Outro dos mellores bancos de Galicia está no corazón das Rías Baixas. En Punta Faxilda, parroquia de Noalla, concello de Sanxenxo (Pontevedra). Trátase dun banco panorámico, instalado no ano 2006, e ofrece unhas vistas espectaculares. Mirando a pleno océano Atlántico pódense ver as Illas Cíes, a Illa de Onza, a Illa de Ons, a Illa de Sálvora, a Punta de San Vicente e, en días despexados, incluso a provincia da Coruña.
Dende o banco de Punta Faxilda pódese contemplar un solpor único. A ubicación do banco, nun balcón natural rodeado de acantilados escarpados, ofrece unha das mellores vistas panorámicas do océano Atlántico.
Banco de Budián (Zas)
Cambiamos radicalmente o noso concepto. Os mellores bancos de Galicia ofrecen vistas de todo tipo. O de Budián, no concello de Zas (A Coruña), ofrece paz, tranquilidade, natureza e relax.
No interior da Costa da Morte, na Terra de Soneira, atopamos a Ruta da Auga de Zas, unha ruta na que se pode descubrir un medio rural caracterizado pola riqueza xeolóxica e natural dos seus montes, onde se pode observar a flora e a fauna da zona con varios muíños e fermosas fervenzas.
En Budián, en plena Ruta da Auga, podemos descansar noutro banco con vistas espectaculares: a fervenza de Budián. Ao encanto do medio natural súmase a mensaxe do respaldo do banco, que di: “Aperta, enxebre, orballo, bico, quérote… Galicia fascina, o galego namora.”
Banco do Pé do Home (Nogueira de Ramuín)
É un dos bancos máis espectaculares de Galicia. Só se pode chegar a pé. En plena Ribeira Sacra, o miradoiro de O Pé do Home conta cun banco cunhas vistas inigualables: a Curva da Ferradura, o peirao de Santo Estevo e os Canóns do Sil. Ideal para sentarse e admiralo todo.
Situado no Monte de Pena do Pobre, no concello de Nogueira de Ramuín, este banco é perfecto para comprender a forma sinuosa do Canón do Sil.
Namoramos da súa paisaxe pola súa abrupta xeografía onde nos sorprenderán os viñedos cultivados en socalcos, un dos elementos máis salientables desta zona, que elabora viños con denominación de orixe.
Banco de Cabo Touriñán (Muxía)
Na Costa da Morte temos outro banco dende o que gozar de boas vistas. Trátase do banco de Cabo Touriñán, colocado polo Concello de Muxía no ano 2015 preto do faro, é de granito e ten gravadas no traseiro as coordenadas da súa localización: “43º03N – 9º18W”.
O rechamante deste banco é que está situado no punto máis occidental da España peninsular. É un lugar especial para contemplar os solpores no océano Atlántico, pola súa condición simbólica de punto de despedida do sol na Europa continental durante dous meses ao ano (entre o 22 de marzo e o 25 de abril e entre o 18 de agosto e o 19 de setembro, aproximadamente).
Banco da Pastoriza (Marín)
En Marín, tras unha longa ruta de sendeirismo de 23 quilómetros, sobre todo se o facemos a pé, atopamos o banco da Pastoriza, onde podemos ver a ría de Pontevedra, a illa de Ons, Sanxenxo ou Beluso.
Nos montes da parroquia de Ardán en Marín, no lugar de Outeiro de Campolongo, atópase este pequeno banco de madeira, na Pastoriza, que serve de excelente miradoiro da Ría de Pontevedra.
Está situado a 400 metros sobre o nivel do mar, cunha vista de 180º, o que permite ver o cabo Udra, Marín, Sanxenxo, as Illas Ons, Sálvora, Poio, o Monte da Curota, a Illa Tambo...
Banco dos Picotiños, Alto da Fernandiña (Cabana de Bergantiños)
O banco de madeira dos Picotiños, situado en Sinde (Canduas, Cabana de Bergantiños), sorprende cunha vista privilexiada como recompensa tras unha moderada subida ao alto da Fernandiña que se pode facer a pé ou en bicicleta.
Este mirador panorámico, que ofrece unha vista privilexiada sobre o Esteiro do Anllóns, permítenos contemplar unha panorámica espectacular do Monte Branco, A Barra do Anllóns, Corme, a desembocadura do río ou, no lado oposto, as terras de Borneiro e o concello de Zas.
Xa visitaches os mellores bancos de Galicia?
Fonte imaxe de cabeceira: Turismo de Redondela.