Preparamos unha breve guía para que poidas cambiar o contrasinal wifi do teu router de R e saibas tamén como modificar o nome da túa rede wifi. O único que necesitas é entrar na túa área de cliente de R e seguir as indicacións que che imos dar. Xa verás que só che leva uns segundos configurar ao teu gusto o wifi da casa.
E para seguir os pasos, non necesitas papel e lapis, aquí todo é en liña 😉.
O primeiro que debes facer é entrar na túa área de cliente de R. Se tes un ordenador diante, teclea no teu navegador clientes.mundo-r.com, e se prefires facelo dende o teléfono móbil, abre ou descarga a app para dispositivos Android ou iOS.
Se es novo por aquí, ensinámosche a rexistrarte na túa área de cliente de R.
Así podes cambiar o contrasinal do teu router wifi
Se xa estás diante da área de cliente de R, sigue esta ruta paso a paso:
- Selecciona o botón “a miña wifi”.
- Pulsa a opción “ver ou cambiar parámetros wifi”.
- Selecciona o teu servizo da internet.
- Vai ao menú “configuración”.
Aí vanche aparecer dúas redes wifi, non é que vexas dobre, non 😉. Explicámosche: en R instalámosche un router dobre banda. É dicir, que o router pódese conectar á banda de frecuencia 2,4 Ghz e á de 5 Ghz (a que termina en _5G).
- Introduce a nova clave no campo contrasinal. Aproveitamos para deixarche aquí unha guía para crear un contrasinal seguro.
- Finaliza premendo o botón “gardar”.
Como ves, podes facer o cambio de contrasinal para unha das túas redes wifis ou para as dúas.
Agora cando conectes calquera dispositivo, móbil, portátil, consola… á wifi terás que introducir o novo contrasinal.
Así podes cambiar o nome das túas redes wifi
Xa viches na pantalla de configuración da túa wifi, que tamén tes a opción de modificar o nome das túas redes wifi.
Así que o ruta de acceso dende a túa área de cliente de R é exactamente a mesma que antes:
- Entra en “a miña wifi”.
- Pulsa “ver ou cambiar parámetros wifi”.
- Selecciona o teu servizo da internet.
- Ve ao menú “configuración”.
- Escribe un novo nome da túa rede. Un consello: se vas poñerlle un nome novo á rede wifi de 5 Ghz, lembra poñer ao final a extensión _5G, porque che permitirá diferencialas facilmente.
- Termina premendo o botón “gardar”.
Así se cambia a canle para mellorar a calidade do sinal
Tamén che fixarás noutro detalle que aparece no panel de configuración da túa wifi: a canle.
Que é iso da canle e por que che aparecen aí uns numeriños?
A calidade do wifi depende das interferencias que teñas en cada momento, podendo cambiar ao longo do día. Se notas que a túa wifi empeorou, posiblemente estean a interferir outras wifis próximas.
O router envía o sinal sen fíos wifi por medio dunha frecuencia no aire. Esta frecuencia funciona como unha estrada (se está moi ocupada retárdase o tráfico). Tes a opción de utilizar diferentes canles, pero en R aconsellamos utilizar as canles 1, 6 ou 11.
Configurar a wifi de R
Así que podes cambialos ti mesmo dende a área de cliente de R, como che dicimos, dende o menú “configuración” da túa wifi.
Tratamos de simplificar todas estas xestións habituais da túa wifi na área de cliente, para que dende unha soa pantalla poidas cambiar o contrasinal do wifi ou o nome das túas redes wifi, como viches nesta guía.
Consúltaa sempre que necesites configurar o teu router wifi de R.
Esperamos que che sirva.