Dispoñer dunha estratexia en ciberseguridade baseada na anticipación, na resiliencia e na colaboración serán esenciais en 2026 para garantir un futuro dixital seguro. Porque as ameazas son cada vez máis complexas e se combinan con tecnoloxías emerxentes e tensións globais.

Durante o último ano, as análises revelaron transformacións profundas no ecosistema de ameazas que poñen de manifesto que a protección das empresas e administracións non é opcional; é crítica para a estabilidade económica e a resiliencia nacional.

O "cibercrime", motivado principalmente por beneficios económicos, incrementou o uso de tácticas como a extorsión, as estafas e a explotación de vulnerabilidades. Ademais, estes ataques volvéronse máis organizados e eficientes e medra o número de incidentes rexistrados, que lles afectan especialmente a pemes, aínda que as grandes empresas e as administracións públicas tampouco están exentas de risco.

Doutra banda, o "hacktivismo" deixou de ser puramente ideolóxico para aliñarse con axendas xeopolíticas. En 2025, o 96% dos ataques dun coñecido grupo ruso dirixíronse a Europa.

Debido a todo isto, a ciberseguridade converteuse nun compoñente esencial da sociedade. E non basta con incorporar solucións tecnolóxicas integrais; necesítanse equipos humanos especializados e procesos robustos capaces de garantir a continuidade e a confianza nas contornas dixitais.

Neste contexto, dúas novas tecnoloxías están a transformar o panorama:

• Intelixencia Artificial. O seu uso malicioso para a automatización de ataques, a xeración de deepfakes ou a explotación de vulnerabilidades amplía a superficie de risco. Aínda que tamén avanza a IA defensiva, a súa fiabilidade e seguridade deben ser auditables e transparentes.

• Computación cuántica. Aínda que promete reforzar a criptografía, tamén podería invalidar os sistemas actuais e obrigar a adoptar novos algoritmos.

A colaboración entre empresas, gobernos e provedores de ciberseguridade será clave. Pola súa banda, as organizacións deben apostar por solucións fiables e adaptadas ao contexto local e global para garantir contornas dixitais seguras e sostibles.

2026 preséntase como un ano no que a ciberseguridade será decisiva e as organizacións deberán centrarse en tres piares: anticipación, para adiantarse aos riscos; resiliencia, para recuperarse rapidamente de incidentes; e colaboración, para traballar xunto a socios e autoridades.

As empresas que prioricen a protección integral e a confianza dixital estarán mellor preparadas para garantir a continuidade e seguridade nunha contorna cada vez máis incerta.

Gonzalo Temes, responsable de Solucións Tech en MasOrange.