As Rías Baixas van desde Fisterra ata a desembocadura do Miño, facendo fronteira entre Galicia e Portugal. Fórmanas as rías de Corcubión, Muros e Noia, Arousa, Pontevedra e Vigo.

Propoñémosche tres percorridos diferentes por esta zona da costa galega que, de forma independente, podes facer en coche nun só día. Ti elixes onde parar e que facer para gozar do teu tempo libre en lugares con praias fantásticas e boa gastronomía. Preparada/o para tomar nota?

Ruta 1. De A Guarda ao Morrazo

Comezamos a nosa ruta na Guarda, a localidade máis ao sur de Galicia, e en concreto no seu castro máis visitado: o de Santa Trega. A razón é, sobre todo, un espectacular miradoiro sobre a desembocadura do Miño e Portugal, en fronte, onde se pode cruzar en ferry.

Un lugar moi interesante para visitar na zona é o conxunto etnográfico dos Muíños do Picón e do Folón, un grupo de sesenta muíños distribuídos en fervenza nas ladeiras do monte Campo do Couto. As vistas sobre O Rosal e a desembocadura do Miño son tamén de impresión.

Seguindo a liña do Atlántico cara ao norte, a nosa seguinte parada é o mosteiro de Santa María de Oia, o único da orde do císter que se acha ao bordo do mar. Construído no século XII, na actualidade pode volver visitarse despois de moitos anos pechado.

Baiona

A real vila de Baiona recibiranos tras sortear o Cabo Silleiro e o seu faro. A escultura da Virxe da Roca; a península de Monte Boi, onde se acha a fortaleza de Monterreal convertida en parador nacional; a réplica da carabela Pinta, que recalou neste porto á súa volta da primeira viaxe a América; o centro histórico ou as súas praias merecen que nos deteñamos.

Para relaxarse e darse un baño suxerimos, con todo, facer uns quilómetros máis para gozar dos longos areais de Praia América e Panxón (Nigrán) ou Samil (Vigo). En Panxón, poderemos ver tamén o peculiar Templo Votivo do Mar, obra do arquitecto Antonio Palacios, igual que a Virxe da Roca.

Vigo e as illas Cíes

Vigo é a maior cidade de Galicia. O parque de Castrelos, o monte Castro, o Casco Vello, o barrio de O Berbés e o mercado da Pedra son algúns puntos imprescindibles. Tamén pertencen ao municipio de Vigo as illas Cíes, que por si mesmas merecen xa que se lles dedique un día completo. En todo caso, os barcos saen da Estación Marítima e hai que lembrar que para comprar o billete necesítase ter antes a autorización de visita da Xunta.

Da Estación Marítima parten tamén os barcos cara a Moaña e Cangas, na Península do Morrazo. Por estrada, teremos que cruzar o icónico ponte de Rande. Pero antes de cruzar, debes saber que o Miradoiro do Campo da Rata, en Redondela, ofrece a panorámica máis instagrameable.

Poñemos fin a este percorrido en Cabo Home ou, aínda mellor, cun pequeno itinerario de sendeirismo entre Monte do Facho e a praia de Melide. Terás vistas sobre a Costa da Vela e as Cíes, poderás facer a foto coa famosa buguina de Cabo Home, visitar tres faros e gozar dunha praia alucinante. Quen dá máis?

Ruta 2. De Poio a Vilagarcía de Arousa

Neste segundo percorrido, pasaremos por algúns dos puntos máis turísticos de Galicia. Comezamos no mosteiro de San Salvador de Poio, municipio lindeiro co de Pontevedra e no que se di que naceu Cristóbal Colón. Tamén pertence a Poio a famosa parroquia de Combarro, paradigma de tipismo galego cos seus hórreos mirando ao mar e rúas empedradas nas que se suceden soportais, balconadas e cruceiros.

Sanxenxo

Non menos coñecida é Sanxenxo, a chamada Marbella galega e que será nosa seguinte parada, antes de bordear a costa pasando polas praias de Canelas ou Montalvo para chegar á ermida de Nosa Señora da Lanzada e ao quilométrico areal da Lanzada, un dos máis coñecidos de Galicia.

O Grove e A Toxa

Na península do Grove recomendamos dedicarlle un tempo para percorrer o carreiro de Pedras Negras de San Vicente do Mar, un curto paseo sobre pasarelas de madeira ao bordo do mar, e a subir ao miradoiro de A Siradella. En outubro, coincidindo coa ponte do Pilar, é obrigatoria a asistencia á Festa do Marisco. En calquera outra época, unha actividade habitual é o paseo en barco mexilloeiro con degustación incluída e, con nenos, a visita ao acuario.

Hai que cruzar despois a ponte decimonónica que nos levará á illa da Toxa, soada polas súas augas medicinais e xabóns. Non hai que deixar de facer a foto coa ermida de San Caralampio, cuberta de cunchas.

Cambados

Xa en plena ría de Arousa, chegaremos a Cambados, dominada pola praza de Fefiñáns co pazo homónimo e a igrexa de San Benito. Estamos na capital do viño albariño, así que procede visitar unha adega e, dende logo, non hai que deixar de subir ata as ruínas de Santa Mariña de Dozo, convertida en cemiterio.

Illa de Arousa, Vilanova de Arousa e Vilagarcía de Arousa

A Illa de Arousa e Vilanova de Arousa, berce de Valle-Inclán, merecen unha visita repousada. No teu plan de viaxe deberías anotar o parque natural de Carreirón e o miradoiro de O Con do Forno na Illa. Outra proposta das que non se poden rexeitar é coller un barco ou unha piragua para achegarse ao illote Areoso, rodeado de fina area branca e augas transparentes.

Acabamos o día en Vilagarcía de Arousa. Hai que visitar o pazo e o convento de Vista Alegre no centro urbano, antes de camiñar polo paseo marítimo ata Carril, onde o seu sería degustar unhas ameixas. A última recomendación conxuga a visita a un pazo coa cata de viño albariño no Pazo de Rubiáns ou no Pazo Baión (este último no municipio de Vilanova). Unha grande experiencia!

Ruta 3. De Corrubedo a O Ézaro

Praias, paraxes naturais, espectaculares miradoiros e vilas medievais son os puntos fortes deste terceiro percorrido, que comeza no Complexo dunar de Corrubedo e lagoas de Carregal e Vixán, parque natural que acolle a duna móbil máis grande do noroeste peninsular e unha das praias máis salvaxes e longas de Galicia, a do O Vilar. Hai que subir o miradoiro de Pedra da Ra para admirar a panorámica e, xa na zona, sería un pecado non achegarse ao dolmen de Axeitos, de época neolítica.

Porto do Son e Castro de Baroña

Continúan os areais de impresión no municipio de Porto de Son con praias como as de As Furnas e Río Sieira, unidas por un paseo de pasarelas de madeira, ou Aguieira. Entre unhas e outras, non podemos deixar de parar en Castro de Baroña, un dos asentamentos castrexos máis emblemáticos e visitados de Galicia pola súa localización no litoral. A praia é unha das máis soadas para facer nudismo.

Noia e Muros

O noso seguinte obxectivo son as vilas medievais de Noia e Muros, que dan nome á ría na que se atopan. Ademais duns centros históricos ben conservados, en cada unha delas atoparemos elementos singulares que, por si sós, merecen a nosa atención: a colección de laudas gremiais de Santa María a Nova, en Noia, e o muíño de marea do Pozo do Cachón, en Muros.

Carnota e Monte Pindo

Aínda en Muros, as praias de Area Maior e O Ancoradoiro, ao pé de Monte Louro, nunha contorna natural de gran beleza, son o aperitivo perfecto antes de recalar na de Carnota, a máis extensa de Galicia con 7 quilómetros de lonxitude. A cima do mítico Monte Pindo é, sen dúbida, o mellor miradoiro para abarcala completa, pero os menos aventureiros poden tamén gozar as vistas ao pé de estrada, con aparcadoiro e pequena área recreativa, no miradoiro de Louredo.

O municipio de Carnota xoga tamén na liga dos hórreos máis grandes de Galicia (e, por suposto, do mundo). Manteñen unha rivalidade secular o da parroquia carnotá de Lira, con case 37 metros de longo, e o da parroquia de Carnota, que ten preto de 35.

Fervenza do Ézaro

A nosa última parada é outra paraxe natural única, a fervenza do Ézaro, pois en toda Europa só o río Xallas desemboca no mar formando unha fervenza. A vista dende o miradoiro, con terrazas a varias alturas, é das que deixa coa boca aberta.

Por que ruta vas empezar? Estamos seguros de que non será a única que fagas. E lembra que unha visita ás Rías Baixas non estará completa sen gozar da gastronomía da zona, comezando polos seus excelentes peixes e mariscos.

Imaxes de: Turismo de Galicia.