A sostibilidade e o coidado do medio ambiente é unha das prioridades na nosa Política de Responsabilidade Social Corporativa. E o noso compromiso contra o cambio climático vén de ser recoñecido pola organización sen ánimo de lucro Carbon Disclosure Project ( CDP).

R obtivo unha valoración B no cuestionario de referencia de cambio climático de Carbon Disclosure Project (CDP), organización internacional que xestiona o sistema mundial de información para que os investidores, as empresas, as cidades, os estados e as rexións midan o seu impacto ambiental.

Trátase dunha enquisa elaborada anualmente e na que R participa dende o ano 2016. Utilizando unha metodoloxía exhaustiva e independente, o CDP avalía as empresas asignándolles unha cualificación da Á a F en función de diversos parámetros:

- exhaustividade da súa información

- concienciación e xestión dos riscos climáticos

- demostración das mellores prácticas asociadas ao liderado ambiental, como o establecemento de obxectivos ambiciosos e significativos

A valoración B outorgada a R posiciónanos como unha das compañías participantes con mellor consideración a nivel mundial. É, ademais, un recoñecemento que valida a xestión dos riscos ambientais asociados á nosa actividade como operador de telecomunicacións e reflicte o compromiso coa xestión responsable en todas as operacións.

Comprometidos co coidado do medio ambiente

A nosa estratexia ambiental está enmarcada no Plan Estratéxico de Sostibilidade 2020-2025 e responde ao compromiso por integrar na xestión o ODS 13 'Acción polo Clima' do Pacto Mundial das Nacións Unidas, ademais de contar cun Sistema de Xestión Ambiental, conforme ao Regulamento EMAS e ISO 14001:2015, e unha Política e Sistema de Xestión Enerxético, segundo a ISO 50001:2018.

Con estes alicerces, apostamos con decisión pola xestión responsable dos recursos e a economía circular, primamos a reutilización fronte á reciclaxe ou a escoura e a redución dos consumos de enerxía e combustible nos nosos plans anuais de Redución de Emisións de CO2. Ademais, aplicamos con éxito a compra de electricidade 100% renovable en todas as sedes, o cal nos permitiu reducir un 59% as emisións directas de GEI (gases de efecto invernadoiro) en 2020.

Por todo iso, sentímonos especialmente satisfeitos con este recoñecemento que confirma o noso posicionamento e transparencia na xestión do impacto ambiental e o clima.

Podes consultar aquí máis información sobre a nosa Política Social Corporativa.