Footprinting é a fase de recoñecemento ou recollida de información acerca dun posible ciberobxetivo; unha fase previa e fundamental tanto para lanzar un ataque como para planificar unha adecuada política de ciberseguridade.
O obxectivo principal é obter a maior cantidade posible de datos sen interactuar directamente ou cunha interacción mínima para coñecer a chamada "pegada dixital".
O footprinting permite identificar a superficie de ataque, descubrir vulnerabilidades, facilitar a resposta a incidentes e deseñar estratexias de protección máis efectivas, anticipándose ás ameazas antes que os ciberatacantes.
Que información se pode recompilar mediante footprinting
Calquera tipo de información pode resultar útil, así que os datos susceptibles de ser recollidos durante o footprinting son moi variados:
• Información de rede: Direccións IP, subdominios, rexistros DNS, localización de servidores...
• Información de sistemas: Sistemas operativos, servidores web, aplicacións en uso...
• Información da empresa: Direccións de correo electrónico, números de teléfono, información corporativa, credenciais...
Tipos de footprinting
Hai dous tipos esenciais de footprinting:
• Footprinting Pasivo: É a recompilación de información sen interacción directa co obxectivo. Reúne datos visibles e dispoñibles publicamente, así que é moi difícil de detectar. Utiliza técnicas de motores de procura, análise de perfís en redes sociais ou revisión de metadatos en documentos públicos.
• Footprinting Activo: Implica interactuar minimamente co obxectivo para obter datos máis precisos. É máis invasivo pero tamén proporciona información máis detallada. Realízase, por exemplo, a través de consultas DNS directas ou do uso de ferramentas para buscar subdominios.
Footprinting vs fingerprinting
Estreitamente relacionado (e ás veces mesturado) co termo footprinting, temos o concepto fingerprinting. Pero non son o mesmo.
Footprinting alude á recompilación de información xeral; fingerprinting é máis específico, recolle información detallada de software, servizos ou versións dun sistema e céntrase en configuracións técnicas concretas.
En moitos casos, o footprinting é a fase previa e o fingerprinting o seguinte paso nun proceso xa máis avanzado de recoñecemento.
