O tempo é ouro en calquera empresa. A día de hoxe existen un bo número de aplicacións pensadas para axudarche a realizar unha xestión máis eficiente do teu tempo. Moitas son gratuítas e gran parte delas dispoñen tamén dunha versión premium por se necesitas algo máis completo ou especializado. En calquera caso, son opcións prácticas entre as que podes elixir en función das túas necesidades concretas: do sector e tamaño da túa empresa, de se estás a traballar nun proxecto individual ou en grupo, na oficina ou en remoto.
Trello: Un xestor de tarefas que inclúe tantos membros, taboleiros e adxuntos como queiras. Permite organizar o traballo, a distancia ou na oficina, achegar arquivos, engadir imaxes ou comentar entre os membros do equipo.
Asana: Unha das ferramentas máis coñecidas. Trátase dunha aplicación orientada á coordinación do traballo en grupo en que cada membro do equipo pode ver nunha sinxela interface moi visual en forma de listaxe o que necesita facer, que tarefas son prioritarias e cales son as datas de entrega.
Jira: Unha ferramenta en liña para administrar e facer seguimento das diferentes tarefas e incidencias dun proxecto. Permíteche utilizar fluxos de traballo predefinidos pola aplicación ou crear a túa propia dinámica de grupo adaptada ás túas necesidades.
Wunderlist: Aplicación dispoñible para calquera dispositivo que permite administrar diferentes proxectos simultaneamente. Funciona como un planificador intelixente que ordena, activa avisos, engade comentarios ou crea tarefas periódicas.
Avasa: Completa plataforma profesional que integra todo o necesario para xestionar un negocio como colaboracións de tarefas, discusións, intercambio de arquivos, administración de gastos e facturación a clientes.
Sesame Time: Pensada inicialmente como unha plataforma para o control de horarios, quendas e vacacións, tamén lles permite ás empresas e aos seus empregados realizar a súa propia xestión do tempo e das tarefas e proporciona datos estatísticos e informes moi útiles para analizar a produtividade da empresa.
Basecamp: Sinxela e eficaz ferramenta coa que podes traballar en remoto e asignar a cada proxecto todo o relacionado co traballo en cuestión coma persoal, discusións, documentos, tarefas ou datas importantes.
Podio: A claridade é a principal baza desta ferramenta personalizada na que os roles están claramente definidos para mellorar o tempo de entrega, a efectividade e as relacións.
Wrike: O traballo colaborativo e o teletraballo, tan importantes nas actuais circunstancias, son a base sobre a que se asenta Wrike, unha ferramenta automatizada que permite ver en tempo real cambios realizados por calquera membro do equipo.
Paymo: Aplicación de xestión de proxectos moi usada por traballadores autónomos que combina a administración avanzada de tarefas co rexistro do tempo e a facturación.
Zojo Projects: Utiliza os diagramas de Gantt para crear o plan do proxecto e realizar un seguimento das tarefas, polo que che permite ver deseguido calquera desviación entre o progreso planificado e o real.
Xa vedes que hai aplicacións para todos os gustos e necesidades porque, sexa cal sexa a actividade da vosa empresa, o obxectivo final é que dispoñades das mellores ferramentas para coordinar os proxectos e os equipos realizando unha eficaz xestión de tempo e esforzos.