O Corpus de Ponteareas 2024 coas súas alfombras florais acaba de ser declarado Ben de Interese Cultural (BIC) e iso hai que celebralo. O domingo 2 de xuño é o día grande do Corpus Christi de Ponteareas 2024, pero as festas comezan días antes e finalizan o luns 3 de xuño, festivo local en Ponteareas. Contámosche o máis destacado do programa do Corpus de Ponteareas 2024 para que non perdas a confección das alfombras florais, a procesión, o desfile de carrozas, a batalla de flores, os concertos e moito máis.
Programa do Corpus de Ponteareas 2024
Un dos momentos máis especiais ten lugar o sábado 1 de xuño pola tarde, cando se empezan a confeccionar as alfombras florais do Corpus en Ponteareas 2024.
O domingo 2 de xuño chega o día máis importante das festas, coa procesión do Corpus de Ponteareas, o desfile de carrozas e a batalla de flores ou a verbena nocturna, que podes gozar ata tarde porque o luns 3 de xuño é festivo local en Ponteareas.
Á espera da publicación do programa do Corpus de Ponteareas 2024 por parte do Concello de Ponteareas, repasamos as principais actividades que esperan por ti estes días na localidade pontevedresa.
Sábado, 1 de xuño
- Pola tarde, comezan os traballos de confección das alfombras florais nas rúas de Ponteareas, como a praza Maior, onde loce a alfombra máis grande.
- Pola noite, a animación musical toma diversos puntos da localidade.
Domingo, 2 de xuño
- Ao redor do mediodía, comeza a misa seguida da procesión do Corpus de Ponteareas 2024, con paradas en alfombras e lugares destacados.
- Pola tarde, ao redor das 19:00 h, comeza o desfile de carrozas e a batalla de flores nas rúas do centro urbano.
- Pola noite, gran verbena na praza Maior.
Luns, 3 de xuño
- Durante todo o día, inchables e animación infantil.
- Ofrenda floral In memoriam aos e ás alfombristas no monumento ao alfombrista.
- Entrega das medallas do Corpus Christi de Ponteareas.
- Pola noite, verbena na praza Maior.
Case 200 anos de alfombras florais no Corpus de Ponteareas
Imaxe: Turismo Rías Baixas
Seguro que todos coñecemos algún pobo próximo que, en maior ou menor medida, realiza alfombras de flores para realzar a fermosura dalgunha procesión ou acto relixioso. Pero en Ponteareas é tal a dedicación dos seus veciños en preparar e realizar as alfombras florais do Corpus que chegaron a ser declaradas de Interese Turístico Internacional en 2009 e agora declarado Ben de Interese Cultural (BIC).
As alfombras de flores están intrinsecamente unidas á celebración do Corpus Christi en Ponteareas. Está festividade comezou a celebrarse na vila pontevedresa no ano 1857, cando por primeira vez se alfombraron unha vintena de rúas para adornar a procesión do Santísimo.
Dende aquel momento, o número de rúas mantívose, pero os tapices cambiaron de tamaño, complexidade e forma, ademais de presentar un deseño diferente cada ano.
A orixe das alfombras de flores
Non existe unha teoría unificada sobre a súa orixe. Hai expertos que aseguran que as alfombras florais dos actos relixiosos, como o Corpus Christi, son herdanzas de manifestacións pagás propias do mes de maio, de diversas accións de grazas en épocas de colleita e de diversas festas primaverais que conmemoran o florecemento da natureza.
Co paso do tempo, sinalan os expertos, a veciñanza comezou a tapar con flores os buratos do percorrido que seguía a procesión. Dado o seu atractivo, comezaron a facer debuxos máis elaborados, ata imitar coas súas flores os clásicos tapices de tecido da época que adornaban as casas adiñeiradas. E todo isto foi o que chegou aos nosos días, con centos de metros de debuxos e filigranas diferentes e moi variadas, coa temática relixiosa de fondo.
Alfombras florais do Corpus Christi en Ponteareas
Imaxe: Turismo Rías Baixas
As alfombras florais son unha forma de celebrar e adornar a procesión do Corpus de Ponteareas, que se celebra 60 días despois do domingo de Pascua.
Durante a noite anterior, todos os veciños e veciñas da vila participan na confección dos delicados tapices multicolores que cubrirán as rúas polas que pasará a solemne procesión. O resultado son fermosas filigranas de arte floral que conseguen enxalzar o esplendor do desfile de Corpus.
Como se fan as alfombras florais en Ponteareas
A veciñanza adoita repartir a tarefa de confección das alfombras por rúas, portais ou baixos, e defolian as flores para o seu uso posterior semanas antes.
Cada persoa coñece a súa función, dende o almacenamento e distribución dos pétalos ata a confección dos debuxos e o seu recheo. É todo un traballo ben organizado.
O deseño dos modelos é a primeira fase do proceso de elaboración que se realiza con meses de antelación. Unhas semanas antes da festa recóllese todo o material vexetal e, máis tarde, as flores.
Xa sobre o asfalto, o sábado pola tarde (o día anterior ao Domingo de Corpus), colócanse os modelos nos que se farán os debuxos, que se cubrirá durante toda a noite con flores e moitos outros materiais (sal, area, terra, café…).
As alfombras máis vistosas da procesión do Corpus de Ponteareas
Para poder visualizar toda a maxestosidade das alfombras florais hai que ter en conta varios puntos crave da procesión do Corpus de Ponteareas. A praza Bugallal, a praza Maior, a rúa Oriente, a rúa dos Ferreiros, a rúa Doutor Fernández de la Vega, a rúa Reveriano Soutullo ou a avenida da Constitución son algunhas das máis importantes.
O Santísimo ábrese paso sobre as alfombras de flores acompañado en todo momento dunha choiva de pétalos que, dende os balcóns, dan forma a un dos momentos máis peculiares desta festa.
Ponteareas acolle tamén a alfombristas doutras zonas, entre os que destacan os da localidade canaria da Orotava, que dan forma a unha alfombra con terra volcánica do Teide.
Agora xa coñeces todo o proceso e traballo que os veciños e veciñas de Ponteareas imprimen nas súas alfombras florais o día do Corpus. Un espectáculo visual e perfumado que deixa sen palabras a todo visitante que ese día decide achegarse á vila pontevedresa. A que estás esperando?
Fonte imaxe cabeceira: Turismo Rías Baixas