blog R

A tecnoloxía que usamos no día a día avanza a pasos de xigante. E se pagar nun comercio directamente co móbil era algo que facían só os modernos, agora parécenos o máis normal. O sistema é o mesmo que o da túa tarxeta do banco contactless, o NFC. Pero co móbil, aforras sacar a carteira, buscar a tarxeta e facer o pago.

Pregúntaste se é seguro? R sae na túa axuda e contámosche paso a paso como pagar co móbil con total tranquilidade. Imos por partes.

• Comproba que o teu móbil teña NFC.
• Descarga e configura unha app de pagos.
• Asegúrate de que o comercio dispoña de TPV contactless.

Como saber se o teu teléfono móbil ten NFC

E que é iso do NFC? Pois é unha tecnoloxía sen fíos que transmite datos ao instante entre dispositivos situados a moi pouca distancia. O teu móbil e o TPV do comercio deben ter ese chip NFC para que se comuniquen.

Comproba se o teu smartphone dispón de NFC:

• iPhone: dende o iPhone 6, todos os móbiles Apple incorporan esta tecnoloxía.
• Android: vai aos “axustes”, busca as opcións de conexión e aí verás se o teu teléfono ten NFC e a opción de activalo.

Descarga unha app compatible coa túa tarxeta bancaria

O seguinte paso é vincular a túa tarxeta bancaria a unha aplicación de pagos, engadindo o número de tarxeta á app. Estas son as máis comúns:

• Google Pay: na súa páxina pay.google.com/intl/es_es/about/banks/ podes ver os bancos cos que colabora.
• Samsung Pay: só para teléfonos e smartwatch de Samsung. Revisa se o teu banco está na lista de entidades compatibles. Neste vídeo podes ver como se agrega unha tarxeta para pagar dende o teu smartwatch:
  

• Apple Pay: para pagar dende o teu iPhone ou Apple Watch. Funciona usando Face ID ou Touch ID.
• Apps propias da túa entidade bancaria: se o teu banco non é compatible con ningunha destas aplicacións, consulta se ten unha app propia para pagar co móbil.

E con isto xa estás listo para pagar co teu móbil. Revisa que tes activado o NFC, desbloquea a pantalla do teu móbil e achega o teu smartphone ao TPV.

É seguro pagar co móbil?

Podes facer pagos co teu teléfono con total tranquilidade porque:

• Para realizar o pago, tes que desbloquear a pantalla do teu teléfono. E só ti coñeces o PIN ou patrón, e nin que dicir ten, a túa pegada dactilar ou recoñecemento facial.
• Pero se che rouban o móbil, ponte en contacto co teu banco, como fas cando che desaparece unha tarxeta.

Iso si, é importante que sigas estas recomendacións de seguridade:

• Activa o NFC só cando vaias realizar un pago.
• Utiliza un sistema de bloqueo de pantalla.
• Ten sempre actualizado o sistema operativo do teu teléfono.

Con todo isto, xa estás listo para pagar directamente co teu móbil coma se fose unha tarxeta.

Pareceuche útil esta información? Para calquera dúbida, déixanos o teu comentario.