Para calquera galego/a, sobre todo da costa, as lonxas de peixe non lle son descoñecidas. Pero telas visitadas ou saber como funcionan é outra historia. As lonxas de Galicia son moi peculiares e merecen coñecerse de primeira man. E agora case todas teñen a posibilidade de ser visitadas. A que estás esperando?
Que é unha lonxa de peixe?
Comecemos polo principio. Unha lonxa de peixe é unha instalación onde se realiza a primeira venda certificada de peixe e de marisco fresco. Nesta primeira venda de produtos do mar pódese adquirir a mellor mercadoría directamente do mar.
Nas lonxas de Galicia recíbese, pésase, clasifícase e véndese o peixe e o marisco que chega fresco do mar. Ademais, súmase o control da Autoridade Portuaria, xa que nas lonxas galegas certifican todo o proceso e a calidade do peixe fresco procedente da pesca de baixura ou de altura.
As vendas nas lonxas galegas
Despois de telo todo clasificado, comeza a venderse nas lonxas de Galicia. Este proceso é peculiar. Nalgúns lugares faise dixitalmente, pero noutros aínda seguen "cantando" os prezos nunha conta atrás onde os compradores paran o proceso cando están de acordo co prezo alcanzado.
Unha vez adquirido, o peixe ou o marisco diríxese aos puntos de venda, xa sexa nas prazas de abastos de todas as cidades e vilas galegas ou a outros puntos de distribución como supermercados ou peixarías.
Como funcionan as lonxas galegas
En Galicia temos 59 lonxas. Todas venden marisco e peixe fresco, aínda que son de moi diferentes tamaños. As lonxas de Vigo, A Coruña, Burela, Celeiro e Ribeira facturan en conxunto case o 75% da totalidade do importe final, mentres que as outras 54 de Galicia supoñen o 25% restante da factura.
Para poder mercar nas lonxas é necesario estar acreditado/a. Non todos poden entrar nunha lonxa e comprar o que alí se vende.
Por que visitar unha lonxa de peixe?
Visitar unha lonxa é outra forma de facer turismo, un turismo de mar. En Galicia pódese gozar de visitas guiadas que explican este peculiar proceso que se representa a diario.
Percorrer as principais lonxas supón empaparse da cultura mariñeira e descubrir como funciona un oficio imprescindible para que todos os mercados de España e de Europa teñan peixe galego.
Poderás descubrir como se fixa o prezo e, sobre todo, saber que detrás da comodidade de facer clic nunha páxina web ou mercar nun supermercado ou nunha praza de abastos hai un traballo duro que hai que valorar. Se estás ou vés a Galicia non debes deixar de visitar as lonxas para entendelo todo.
As lonxas máis famosas de Galicia
Para comprobar como vai a pesca do mar ao porto e de aí á túa mesa, nada mellor que visitar as lonxas máis famosas de Galicia. Prepárate para coñecer as peculiaridades das seguintes lonxas galegas.
A Lonxa do Grove
A Lonxa do Grove está especializada na pesca de baixura e de marisqueo. É a que marca o prezo do marisco que comemos no Nadal xa que é a máis importante a nivel europeo.
Por esta lonxa pasan moitos tipos de peixe: xurelo, ameixas, linguado, raia... Pero un dos produtos máis traballados nesta lonxa, e protagonista da súa festa do marisco, son os centolos.
A Lonxa do Grove adaptouse aos novos tempos e ten un lugar especial para observar a poxa para os turistas. Ten habilitados uns chanzos na parte superior, para non perturbar a compravenda.
Pódese visitar de xeito guiado a través dos servizos de Pescanatur O Grove, observando como chega ao longo do día o peixe e o marisco capturado, como se pesa e etiqueta e como se prepara para a súa posterior poxa.
A Lonxa de Vigo
A Lonxa de Vigo é a máis importante de Galicia. Descárganse máis de tres toneladas de produto ao día. En 2019 facturou 183 millóns de euros tras vender máis de 80.000 toneladas de peixe.
Vigo é líder europeo na venda de peixe fresco e conta cunha gran lonxa na que cada mañá ten lugar un espectáculo frenético no que, sempre en descenso, o mellor peixe do mundo se poxa directamente aos mercados de media Europa.
A Autoridade Portuaria de Vigo ofrece a posibilidade de visitar, previa solicitude cunha semana de antelación como mínimo, as súas infraestruturas e instalacións.
A Lonxa de Portonovo
A nova Lonxa de Portonovo foi deseñada co obxectivo de integrar aos turistas interesados nas actividades que alí se desenvolven. Ofrece todas as comodidades, polo que é unha boa aposta para quen queira velos de primeira man.
Consta de tres grandes naves industriais onde os operarios preparan os útiles de pesca, ademais dispón dunha cafetería para que os visitantes poidan relaxarse despois de ver a poxa. Esta lonxa move un gran volume de peixe fresco, do que destacamos o peixe azul e entre eles o xurelo.
Para visitala pódese enviar un correo electrónico a [email protected], chamar ao 986 72 08 02 no horario de apertura da confraría ou a través da web da Confraría de Portonovo na sección de turismo.
A Lonxa de Fisterra
A Lonxa de Fisterra inaugurouse en 2008 e concibiuse como a primeira turística de Galicia. Só tes que coñecer a hora de inicio da poxa para concertar a correspondente cita. Conta cunha zona onde poder sentar e ver como se realiza a poxa diaria de peixe e de marisco.
A lonxa conta con pantallas nas que se amosan as distintas especies que se poden atopar e información sobre cada unha delas.
As visitas pódense realizar durante todo o ano pero antes hai que consultar coa Confraría de Fisterra, que se encarga de organizar toda a lonxa.
A Lonxa de Burela
En 2021, a Lonxa de Burela puxo en marcha un sistema de poxa pioneiro, que a converteu na única poxa oral de peixe automatizada do planeta.
Unha gravación con voz de muller canta os prezos de maior a menor, tal e como se facía no pasado, pero automatizando a asignación dos lotes cando o indican os compradores, permitindo que os datos estean dispoñibles ao instante.
Se queres asistir á poxa ou coñecer a lonxa, durante os meses de verán, xullo e agosto, poderás visitala grazas ás denominadas “Rutas da lonxa”. Todos os luns de 18.30 a 19.30 h, de martes a xoves de 19.30 a 20.30 h e os venres de 19.00 a 20.00 h.
A duración aproximada da visita é dunha hora e hai prazas limitadas (máximo 30 persoas). Todo é gratuíto, pero é imprescindible reservar previamente na Ruta do Peixe.
A Lonxa de Ribeira
A Lonxa de Ribeira está situada no porto costeiro máis importante do continente. En 2015 foi remodelado, converténdoo no máis moderno de Galicia.
O tipo de pesca máis estendido nesta lonxa é a de baixura, como na maioría das lonxas galegas; por iso adoitan realizarse varias poxas durante o día, a medida que o peixe chega ao porto.
A actividade desta lonxa comeza ás 18.00 horas, pero pódese ampliar con sesións de poxas ao longo das 24 horas. Un dos produtos máis valorados que se pon á venda nesta lonxa é a anchoa.
Para poder visitala, nos meses de verán fanse percorridos abertos. Hai que estar atentos ás datas a medida que se achega o verán e poñerse en contacto a través da conta de Facebook da lonxa.
A Lonxa da Coruña
A Lonxa da Coruña é a primeira de España na venda de pescada, xurelo e sardiña, entre outras especies. En 2019 embarcou máis de 33.000 toneladas. É un dos favoritos dos compradores europeos, dada a excelente calidade do peixe e do marisco.
Esta lonxa é un dos principais mercados de Galicia, o segundo en tamaño e movemento de produtos. Aquí pódese ver todo tipo de peixes e mariscos: polbos grandes, rape, cangrexos enormes ou pescada.
As visitas son moi limitadas, non ten as facilidades das demais, pero nalgúns casos si se fan. Para intentalo hai que poñerse en contacto coa Autoridade Portuaria. Os mellores días para visitar a lonxa son os martes e os xoves, xa que eses días, ademais da tradicional poxa debaixura, celébrase deseguido a poxa de altura. A visita é gratuíta.
A Lonxa de Muros
Dentro da ruta mariñeira de Muros pódese visitar súa lonxa coa súa fábrica de xeo, zona de pesaxe e por suposto, a zona de poxas. Está administrada pola Confraría de Pescadores de Muros, que conta cunha frota de 66 pesqueiros e 74 mariscadoras a pé. A Lonxa de Muros destaca polas súas capturas de navallas, cangrexos e polbo.
Para as visitas hai que poñerse en contacto coa propia Confraría de Pescadores de Muros.
Agora que xa sabes como funcionan as lonxas e coñeces as máis populares, só tes que escoller un día e reservar unha visita guiada. A que estás esperando?
Fonte imaxe cabeceira: PescadeRías.