Os Canóns do Sil, na Ribeira Sacra, son un dos elementos máis importantes da riqueza natural de Galicia. Contámosche que ver, as rutas en catamarán polos Canóns do Sil, as rutas enoturísticas e de sendeirismo para que planifiques a túa visita.
É que os Canóns do Sil non deixan indiferente a quen os visita. Entre as provincias de Lugo e Ourense, a pouco máis de douscentos metros de altura, sitúase o tramo final do río Sil. Máis de 35 quilómetros dun profundo desfiladeiro excavado na rocha, auga e curvas sinuosas con grandes pendentes verticais (que nalgún momento chegan aos 500 metros) traballadas polo río Sil dende tempos inmemoriais.
Todo este espectacular lugar foi e é, hoxe en día, o sustento de moitos habitantes da zona, que elaboran o famoso viño da Denominación de Orixe Ribeira Sacra. Pero todo este medio natural é tamén refuxio de múltiples especies animais e vexetais.
Que ver nos Canóns do Sil
Son moitos os atractivos que se poden ver nos Canóns do Sil. Dende antigos mosteiros ata modernas adegas. Pódense explorar a pé, en coche ou en catamaráns modernos. Diferentes formas de apreciar toda a beleza desta contorna natural.
Imos amosarche todo o que ofrece este lugar. Todo o que podes ver e facer para sacar o máximo proveito dunha das zonas máis máxicas de toda Galicia.
Rutas en catamarán polos Canóns do Sil
A mellor forma de coñecer os Canóns do Sil é ter unha visión global da súa magnitude. E non hai mellor maneira que navegar polo río SIl. Para iso, existen empresas que se encargan de ofrecer rutas en catamarán nos Canóns do Sil dende varios puntos diferentes.
Dende Castro Caldelas, as empresas Brandán e Viajes Pardo, ambas as dúas dende o peirao de Abeleda, ofrecen viaxes de máis de hora e media e con prezos que oscilan entre os 13 e os 20 euros.
No peirao da Ponte do Sil, no concello de Monforte de Lemos, a Deputación de Lugo ofrece unha ruta en catamarán moi económica, só 9€, e cunha duración dunhas dúas horas. As reservas fanse en liña ou por teléfono.
Desde Sóber, Siltrip pon en marcha unha ruta dende o peirao dos Chancís. Esta viaxe é máis pequena, só para 12 persoas, e o seu prezo é de 18€.
Se sodes un grupo numeroso de visitantes, a mellor opción é saír dende Nogueira de Ramuín, onde Viajes Hemisferios ofrece 95 prazas para un paseo de hora e media con saída dende o peirao de Santo Estevo.
Cabe destacar que todas as rutas están suxeitas ao nivel da auga dos encoros, polo que poden sufrir cancelacións, sobre todo no verán.
Canóns do Sil: igrexas e mosteiros
Os Canóns do Sil non só ofrecen unha contorna natural de gran beleza. Contan tamén cun rico patrimonio histórico-artístico, sobre todo edificios relixiosos: mosteiros, igrexas, capelas... Seleccionamos cinco delas, entre as máis fermosas da Ribeira Sacra e que non debes perder:
O mosteiro de Santa Cristina de Ribas de Sil atópase nun lugar espectacular do souto de Merilán. O mosteiro ten a súa orixe no século X. Foi primeiro un mosteiro independente e tras a reforma do século XVI pasou a ser priorado dependente do mosteiro de Santo Estevo de Ribas de Sil.
O mosteiro de Santo Estevo de Ribas de Sil é un dos conxuntos máis destacados e espectaculares do patrimonio monumental de Galicia. Foi construído entre os séculos XII e XVIII. A tradición di que Santo Estevo foi fundado no século VI por San Martín Dumiense.
O colexio Nosa Señora A Antiga é un dos edificios máis emblemáticos de Monforte de Lemos, situado no corazón da cidade. Foi fundada polo cardeal don Rodrigo de Castro, quen creou un gran centro educativo rexentado polos xesuítas e baixo o patrocinio da Nosa Señora A Antigua.
O mosteiro cistercense de Santa María de Xunqueira de Espadanedo, un dos máis descoñecidos da Ribeira Sacra, ten a súa orixe nun cenobio altomediaval que se consolida como benedictino no século XII. Pasou por moitos estilos arquitectónicos ao longo da súa historia, dende o románico ata o barroco.
O mosteiro de San Pedro de Rocas está situado no monte Barbeirón, rodeado de montañas e picos rochosos que puideron darlle nome a este lugar. É un dos primeiros lugares de Galicia onde se produce o paso da vida solitaria á vida en grupo.
Miradoiros dos Canóns do Sil
Se xa coñeces o patrimonio histórico-artístico e xa viches de primeira man a maxestuosidade do río Sil dende un catamarán, é hora de que comeces a escalada en altura.
Os canóns do Sil ofrecen unha completa rede de miradoiros. Atopámolos nas dúas beiras do río e a maioría están moi ben sinalizados.
Localízanse nas zonas máis altas do canón, permitindo observar tanto o estreito percorrido do Sil como os terreos que se estenden ao seu redor. No seguinte enlace mostrámosche os mellores e máis coñecidos miradoiros dos Canóns do Sil:
Rutas enoturísticas do Sil
Nos últimos anos o auxe do enoturismo sumouse aos grandes atractivos dos Canóns do Sil. As adegas que colleitan viños da Denominación de Orixe Ribeira Sacra son moi variadas, pero seleccionamos algunhas coas que podes facer unha ruta enoturística inigualable:
En Ronsel Do Siles cultivan as principais variedades de uva autóctona galega ao máis puro estilo de “viticultura heroica”. As súas dúas hectáreas de terreo permiten apreciar o duro proceso de vendima que produce un dos viños novos máis apreciados da zona.
A Adega Algueira, con máis de 40 anos de historia, converteuse nun referente no que se refire ás adegas da Ribeira Sacra. Os seus viñedos están plantados en socalcos sobre os escarpados Canóns do Sil. Entre os seus viños tintos podemos destacar os mencía e os godellos.
Bodegas Petrón acadou gran sona como resultado do exquisito viño mencía coñecido como Prómine, que lle valeu a distinción Vinespaña de ouro en 2018. Un éxito máis que confirma o sabor inigualable da DO Ribeira Sacra.
A Adega Verao conseguiu converter o viñedo Cividade nun magnífico representante da DO Ribeira Sacra. A súa produción autóctona de mencía amandi e godello produce un dos viños máis premiados da comarca. Debido á pendente do terreo, o transporte das súas uvas faise en barcos. É todo un espectáculo poder visitalos durante os meses da vendima.
Turismo ornitolóxico nos Cañóns do Sil
A impoñente paisaxe dos Canóns do Sil agocha máis dunha sorpresa. O que moitos non saben é que en todos eses bosques de acantilados e rochas que se erguen esconden unha gran variedade de aves que viven nun ecosistema moi especial.
A zona alberga un interesante catálogo de aves, especialmente durante a época de cría entre abril e xullo. Destaca a presenza do falcón peregrino, a curuxa real, o tordo solitario e a aguia real.
Se estás interesado en coñecer de primeira man toda esta riqueza animal, a Axencia de Turismo ofrece, a través de Galicia Birding, as mellores rutas para o avistamento destas aves. Ata cinco itinerarios diferentes para realizar a pé ou en coche polos Canóns do Sil.
Rutas de sendeirismo polos Canóns do Sil
O sendeirismo polos Canóns do río Sil é outra actividade imprescindible para completar unha viaxe por este recuncho da Galicia interior. Son moitas as rutas posibles que podemos considerar para calzar as nosas zapatillas e camiñar. Algunhas das máis populares son:
A ruta sobre o río Mao é un espectacular paseo que transcorre pola canle do río Mao, unha paisaxe de bosques autóctonos que pasa pola necrópole medieval de San Vitor de Barxacova.
A ruta da Cubela ten un percorrido sinxelo marcado pola súa presenza romana xa que na Cubela había unha mina romana da que extraían ouro. Non é unha zona moi empinada e permite contemplar o meandro da Cubela en todo o seu esplendor.
A ruta dos Bosques Máxicos está formada por dous bucles, un de 15 quilómetros e outro de 6 quilómetros. Ten unha dificultade moderada polo seu desnivel e lévanos polos soutos de poboeiros cheos de carballos e castiñeiros milenarios, por aldeas de pedra e corredoiras de muros de pedra cubertos de musgo...
Despois de todos estes posibes plans que che propuxemos, xa non tes escusa para visitar os Canóns do Sil. A súa paraxe espectacular non che deixará indiferente, pero tampouco as posibilidades de ocio. Só tes que poñer roupa cómoda e gozar do que a natureza nos ofrece.
Fonte imaxe cabeceira: Turismo de Galicia