Din que en Santiago sempre chove. E ese sambenito que a cidade leva cargando durante anos, esta vez é verdade. Porque este verán van chover estrelas no Monte do Gozo. As de “O Son do Camiño-Perseidas” deste Xacobeo 21-22.
‘Nunca choveu que non escampara’
A cultura segue e os concertos volven ao Monte do Gozo. Dende R, como patrocinadores oficiais, non podemos estar máis contentos con esta aposta pola reactivación do sector cultural e o impulso aos artistas galegos.
E é que os concertos marcan a esencia de cada Xacobeo. E aínda que este ano a pandemia da COVID-19 impide realizar eventos multitudinarios, o ciclo “O Son do Camiño-Perseidas” supón o regreso aos espectáculos públicos con todas as garantías.
18 artistas en 11 días
“O Son do Camiño-Perseidas” empeza o seu camiño o 14 de xullo e remátao o 8 de agosto. Polo escenario do Monte do Gozo pasarán artistas como Rozalén, Camilo, Andrés Suárez, Loquillo, Vetusta Morla, Ara Malikian, Beret, Estopa, Izal, Raphael, Melendi ou Xoel López.
O cartel complétase con Guadi Galego, Pablo Lesuit, Sabela, Furious Monkey House, David Rees e Maren.
Os concertos poderán gozarse sentados en grupos de 1, 2 ou 4 persoas en cada unha das zonas en que se dividiu o recinto e que levan o nome dos accesos a Santiago dende as rutas do Camiño: Trinidade, Camiño Francés, Faxeira, Algalia e Mazarelos.
O prato forte para 2022
Este Xacobeo 21-22 é o máis especial da historia, por todo o que supón. E, sobre todo, pola súa ampliación a dous anos.
2022 seguro que nos permite celebrar como se merece este Ano Santo. Entón volverá “O Son do Camiño” ao que estamos afeitos e que tivo que aprazarse este ano. E será a gran festa de Galicia.
A organización do Xacobeo 21-22 manterá boa parte dos cabezas de cartel que estaban previstos. Manteranse Bad Bunny, Daddy Yankee, The Chemical Brothers ou Liam Gallagher?
O que choveu dende aquel “Concierto de los Mil Años” de 1993
Os concertos multitudinarios do Xacobeo que coñecemos hoxe en día arrincaron no ano 1993. O encargado de inaugurar o Monte do Gozo non podía ser outro que o “Boss”. Bruce Springsteen toleou ao público aquel mes de maio. E repetiu visita a Compostela en 2009.
Dentro dese Xacobeo de 1993, outro macro evento fixo historia na Coruña: O “Concierto de los Mil Años”. Un abarrotado Estadio de Riazor recibía entre o 8 e o 10 de xullo a Sting, Bob Dylan, Neil Young, Robert Plant, Chris Isaak, George Benson, The Kinks, John Mayall, Eric Burdon, Bo Diddley, Wilson Pickett, Jerry Lee Lewis e Chuck Berry.
E iso foi o principio dunha longa listaxe de estrelas internacionais que fixeron historia en Galicia cada Xacobeo.
1999 foi o ano de The Rolling Stones; en 2004 actuaron Red Hot Chili Peppers, Chemical Brothers, Bob Dylan, The Cure, Iggy Pop, Muse ou Lou Reed.
E en 2010, o último Xacobeo ata hoxe, recibiamos a Arcade Fire, Muse, Jean Michel Jarre, Elvis Costello, Diana Krall ou Mark Knopfler. Tamén Damon Albarn na Coruña ou Leonard Cohen en Ourense.
E ti, estiveches nalgún daqueles históricos concertos do Xacobeo? Cóntanos nos comentarios.