Despois das luces de Nadal de Vigo chega a nova atracción turística da cidade olívica: o ascensor Halo Vigo. Cunha altura de 50 metros, o Halo de Vigo afórralle uns 2 quilómetros e unhas cantas costas aos vigueses. Pero ademais de facilitar a mobilidade, o Halo Vigo Vialia é un auténtico miradoiro cunhas vistas impresionantes da ría. Infórmate aquí do horario do Halo Vigo, do seu prezo, dos accesos, da iluminación e dos arquitectos que o deseñaron, entre outras curiosidades.
Como é o Halo Vigo
O ascensor Halo Vigo ten unha altura de 50 metros e está formado por dúas cabinas de 2,73 metros cadrados e unha capacidade para 17 persoas cada unha, que soben a través dunha pasarela de cristal translúcido ata o miradoiro circular duns 90 metros de diámetro.
O traxecto dura algo máis de 25 segundos e alcanza unha velocidade de 1,6 metros por segundo.
Conta con dous accesos: por Vialia (Centro Comercial Vialia Estación de Vigo) e pola rúa Serafín Avendaño, porque precisamente conecta a parte alta e baixa de Vigo.
E ese é o principal obxectivo do proxecto deseñado polos arquitectos do Halo Vigo, Arenas&Asociados, xunto con AM2 Arquitectos e os portugueses NOARQ, mellorar a conectividade peonil; pero é tamén o novo miradoiro panorámico de Vigo.
Como se accede ao ascensor Halo Vigo
Como che diciamos, podes coller o ascensor Halo Vigo dende a rúa Serafín Avendaño ou dende Vialia.
Grazas a este elevador os cidadáns e os visitantes afórranse dar un rodeo de máis dun quilómetro, con costas, para ir á estación de tren Vigo Urzáiz ou á estación de bus, por exemplo.
E é que o Halo de Vigo comunica a parte baixa da cidade, Serafín Avendaño e toda a zona de García Barbón, Arenal e Rosalía de Castro, coa parte alta, praza de Vialia e Vía Norte.
Horario Halo Vigo
O ascensor Halo Vigo abre dende moi cedo, 6 da mañá, ata ben entrada a noite todos os días da semana.
Merece a pena velo de noite, porque a iluminación do Halo Vigo é espectacular. Case 9.000 luces LED aluman o elevador e a súa contorna, converténdoo nun atractivo único da cidade. Ademais, iluminarase de forma especial en ocasións e efemérides de Vigo.
Este é o horario do Halo Vigo:
- de domingo a xoves: de 6:00 a 23:00 h.
- venres, sábados e véspera de festivo: de 6:00 a 01:00 h.
Ascensor Halo Vigo: prezo
Canto custa subir ao Halo? Nada, o novo ascensor Halo Vigo é gratis. Así que non pagarás nada polas impresionantes vistas panorámicas dende arriba. E, dende logo é un aforro de tempo que agradecerá a veciñanza.
Neste vídeo podes ver como é subir ao Halo Vigo:
Agora tócache a ti.
Fonte imaxe de cabeceira: Concello de Vigo